მსოფლიოს 2022 წლის ჩემპიონატის ზაფხულიდან ზამთარში გადატანის გამო ფიფას ევროპული კლუბებისთვის კომპენსაციის გადასახდელად დაახლოებით 1 მილიარდი ევროს გამოყოფა მოუწევს. საკომპენსაციო თანხის ზუსტ ოდენობაზე მსოფლიო ფეხბურთის მმართველ ორგანიზაციას ოფიციალური განცხადება ჯერ არ გაუკეთებია, თუმცა ევროპული პრესა ამ საკითხს გადაწყვეტილად მიიჩნევს.
როგორც ცნობილია, მსოფლიოს ჩემპიონატი ყატარში 2022 წლის 21 ნოემბრიდან 18 დეკემბრის ჩათვლით გაიმართება. ტურნირის ზაფხულის ნაცვლად ზამთარში ჩატარების მიზეზი მასპინძელი ქვეყნის კლიმატური პირობებია - ზაფხულის აუტანელი სიცხეები, რამაც შესაძლოა ფეხბურთელთა ჯანმრთელობას პრობლემა შეუქმნას.
2022 წლის მუნდიალის თარიღის შეცვლამ განსაკუთრებით ნეგატიური რეაქცია გამოიწვია წამყვანი ევროპული ჩემპიონატების მესვეურთა შორის, რომელთაც ამ გადაწყვეტილების გამო თავიანთი ტურნირების კალენდრის მნიშვნელოვნად კორექტირება მოუწევთ.
აღსანიშნავია, რომ მუნდიალის ყატარში ჩატარების იდეას მსოფლიო ფეხბურთში თავიდანვე ბევრი მოწინააღმდეგე ჰყავდა, თუმცა ფიფამ, ყოფილი პრეზიდენტის იოზეფ ბლატერის მეთაურობით, საბოლოოდ მაინც ასეთი არჩევანი გააკეთა, რაც ფეხბურთის მმართველ ორგანიზაციას როგორც ჩანს ძვირი დაუჯდება.
