თურქეთში მოსამზადებელ შეკრებაზე მყოფმა თბილისის „ლოკომოტივმა“ მეორე ამხანაგური მატჩი გამართა. გიორგი დევდარიანის შეგირდები ამჯერად უკრაინულ „დნიპროს“ დაუპირისპირდნენ და 2:1 იმარჯვეს.

ანგარიში 60-ე წუთზე თბილისელთა კაპიტანმა დავით უბილავამ საჯარიმოს მისადგომებიდან მოხდენილი დარტყმით გახსნა, 81-ე წუთზე კი გიორგი რეხვიაშვილმა შესანიშნავად შეასრულა საჯარიმო დარტყმა და ორამდე გაზარდა მისი გუნდის უპირატესობა. უკრაინელებმა ერთი ბურთი მატჩის მიწურულს გაქვითეს.

გიორგი დევდარიანმა „ლოკომოტივი“ ასეთი შემადგენლობით ათამაშა:

ქურდაძე (შეროზია), უბილავა, გაბაძე (თომაშვილი), რეხვიაშვილი, ღონღაძე (ვარძელაშვილი), ჭანტურია (ძებნიაური), სამურკასოვი (დიასამიძე), კიკაბიძე (ჩიტეიშვილი), ქავთარაძე (ბუღრიძე), კომახიძე (არველაძე), სიხარულიძე (გავაშელიშვილი)

შეგეხსენებთ, რომ "ლოკომოტივმა" პირველი სპარინგი თურქეთში 12 თებერვალს, დანიურ "ჰელსინგორთან" ნოდარ ქავთარაძისა და ირაკლი კომახიძის გოლებით 2:0 მოიგო. თბილისელები მესამე ამხანაგურ მატჩს 18 თებერვალს, ყაზახური "ქაისარის" წინააღმდეგ გამართავენ.

"ლოკომოტივის" პრესსამსახურის ფოტო

DNIPRO TV-ს ვიდეო