კალათბურთში ,,ა“ ლიგის მეოთხე ტური ასპარეზობის ერთპიროვნულ ლიდერ ,,დელტასა“ და ,,ტიტების“ მატჩით გაიხსნა. ამ შეხვედრამდე ,,დელტას“ წაგება არ ჰქონდა, ხოლო ,,ტიტები“ არენა 75-სა და თსუ-ჰიუნდაისთან ერთად ერთპიროვნულ ლიდერს ერთი ქულით ჩამორჩებოდა.

როგორც მოსალოდნელი იყო, შეხვედრა უაღრესად დაძაბული გამოდგა, სამი მეოთხედის განმავლობაში მასპინძლები ლიდერობდნენ, რომლებიც დასკვნითი მეოთხედის წინ 56:51 იგებდნენ. ეტყობა, მარნეულელმა კალათბურთელებმა ნაადრევად ირწმუნეს გამარჯვება, ამით ისარგებლა მეტოქემ, რომელმაც მალე ანგარიში გაათანაბრა, ხოლო ბოლო მეოთხედის მესამე წუთის ბოლოს წინ გასვლაც მოახერხა 58:56.

ძირითადი დროის დასრულებამდე 3:43 წუთით ადრე ანგარიში 67:60 იყო ,,ტიტების“ სასარგებლოდ. დარჩენილ დროში ,,დელტა“ ბევრს ეცადა, მაგრამ მატჩის გადარჩენა ვეღარ შეძლო და მხოლოდ ანგარიშში სხვაობის შემცირებით დაკმაყოფილდა. 67:66 გაიმარჯვა ,,ტიტებმა“ და აწ უკვე ყოფილ ლიდერ ,,დელტას“ წამოეწია.

ამ შეხვედრაში ყველაზე შედეგიანი მასპინძელთა ამერიკელი ლეგიონერი დეანდრე რეი იყო, რომლის ანგარიშზეც 18 ქულა და 8 მოხსნაა.

სტუმართა შორის ამ მხრივ რაიან არონი და ნეით დრეიტონი გამოირჩნენ. არონმა 16 ქულა, 8 მოხსნა და ამდენივე პასი, ხოლო დრეიტონმა ამდენივე ქულა და 9 მოხსნა მიითვალა.

,,დელტა“-,,ტიტები“ 66:67 (16:18, 24:14, 17:19, 10:16)