საქართველოს უმაღლესი ლიგის ბინადარმა ფოთის “კოლხეთმა” კენიის ნაკრების ფეხბურთელი დაიმატა. ამის შესახებ მეგრული გუნდის ფეისბუქგვერდი იტყობინება. 20 წლის მარცხენა მცველი, რომელსაც თამაში ნახევარდაცვაშიც შეუძლია – ერიკ უმა ოტიენო.

ახალგაზრდა ფეხბურთელი ბოლოს სამშობლოში, “გორ მაჰიას” რიგებში თამაშობდა. შარშან კი, კენიის ნაკრების მაისურიც მოირგო და აქამდე 8 თამაშის გამართვა მოასწრო.

2016 წელს ერიკ უმა კენიის პრემიერლიგის საუკეთესო ახალგაზრდა ფეხბურთელადაც დასახელდა.

"კოლხეთმა" ერიკ ოტიენის თანამემამულეც დაიმატა: ლუის ტერა 22 წლის ნახევარმცველი, რომელიც 2013-2015 წლებში ფრანგული "ნიცას" მეორე გუნდში გამოდიოდა და საფრანგეთში 14 თამაშიც ჩაატარა.

გარდა ამისა, ფოთელთა ღირსებას მომავალ სეზონში პაპუნა მოსემღვდლიშვილი დაიცავს. 22 წლის ქართველმა მცველმა გასული სეზონი ბელორუსიის "სლავიაში" გაატარა, რომლის რიგებშიც ჩატარებულ 18 მატჩში 3 გოლის გატანა მოახერხა. იქამდე მოსემღვდიშვილი "სასკოსა" და "სიონის" შემადგენლობაში გამოდიოდა. ასევე, "კოლხეთში" გააგრძელებს კარიერას ავთო ენდელაძე, რომელიც ბოლოს ქუთაისის "ტორპედოში" თამაშობდა.