კალათბურთი

12:33 | 29.11.2016 | ნანახია [] - ჯერ

ფაჩულიამ და "გოლდენ სტეიტმა" "ატლანტას" სძლიეს

ზაზა ფაჩულიას "გოლდენ სტეიტმა" ზედიზედ მე-12 გამარჯვება მიითვალა. "მეომრებმა" ეს, დღეს, ოკლენდში, გვარიან ბრძოლაში მოახერხეს. კალიფორნიას ესტუმრა ფაჩულიას ყოფილი გუნდი "ატლანტა", რომელმაც ზაზას მერე ალ ჰორფორდიც დაათრეიდა და ამ სეზონის წინ "ჰიუსტონიდან" წამოიყვანა ნბა-ს ყველაზე მასიური და სახელიანი ცენტრი დუაიტ ჰოვარდი. "სუპერმენისა" და სხვა ყოჩაღი ატლანტელების მეოხებით, ოკლენდელებმა გვარიანად ინერვიულეს, მაგრამ ისე არ გატყდნენ, რომ 11-მატჩიანი წაუგებელი სერია შინაურ არენაზე შეეწყვიტათ.

თამაში თანაბარი იყო, მასპინძლებმა ვერ გატეხეს "ატლანტა", რომელსაც მარჯვედ მიუძღვოდა სანაკრებო დონეზე ფაჩულიას მომავალი მეტოქე - გერმანელი დენის შროდერი. "გოლდენ სტეიტი" მესამე პერიოდის უმეტესობას აგებდა, ბოლო პერიოდი კი ოკლენდელებმა ერთქულიანი ჩამორჩენით დაიწყეს.
გადამწყვეტ 12-წუთეულში "გოლდენ სტეიტის" ლიდერების - კევინ დურანტისა და სტეფ კარის მექულეობით მასპინძლებმა ხელჩასაჭიდი ლიდერობის მოპოვება მოახერხეს, რაც გუნდური თამაშითა და დრეიმონდ გრინის გონივრული თამაშით ბოლომდე შეინარჩუნეს - 105:100.

ზაზა ფაჩულია სასტარტო ხუთეულში იყო და მოედანზე 16 წუთი დაჰყო. ზაზამ თავი არავის დააჩაგვრინა და იმ დროში, რაც პარკეტზე გაატარა, საკმაოდ შედეგიანად გაისარჯა. ოკლენდელთა 27-მა ნომერმა 2-დან ორივე ორიანი ჩააგდო და 4 ქულას 6 მოხსნა, 1 პასი და 1 დაფარება მოაყოლა. გამარჯვებულთაგან 25-25 ქულით სტეფ კარი და კევინ დურანტი გამოირჩნენ. ამ უკანასკნელმა 14 მოხსნაც მიითვალა და მატჩის საუკეთესო შედეგი დააფიქსირა. ატლანტელთაგან 24 ქულით საუკეთესო იყო შროდერი, ხოლო დუაიტ ჰოვარდის ანგარიშზე 14 ქულა და 16 მოხსნა დაგროვდა.

ამ მოგებით ოკლენდელებმა დასავლეთ კონფერენციაში ლიდერობა გაიმყარეს და ახლა 16-ის წილ 2 მარცხი გააჩნიათ. შემდეგი მატჩი ფაჩულიას გუნდს 2 დეკემბერს, ისევ შინ, „ჰიუსტონთან“ ელის.

gbf.ge

0.122302