ერთდღიანი შესვენების შემდეგ განახლდა მოჭადრაკე ვაჟთა შორის მსოფლიო ჩემპიონის ტიტულისათვის ბრძოლა, სადაც ერთმანეთს მოქმედი ჩემპიონი მაგნუს კარლსენი და ამ ტიტულის მაძიებელი სერგეი კარიაკინი ხვდებიან. ასპარეზობას ნიუ-იორკი მასპინძლობს.

ამ დაპირისპირებაში ფავორიტად კარლსენი ითვლებოდა, მაგრამ ჯერჯერობით პროგნოზი არ მართლდება, რადგან პრეტენდენტი ერთქულიანი უპირატესობით ლიდერობს.

მეცხრე პარტიაში თეთრებით კარიაკინი თამაშობდა, მას შეხვედრის შუა მონაკვეთში მოგების რეალური შანსი ჰქონდა, თუმცა გადამწყვეტ მომენტში კარლსენი თითქმის უიმედო სიტუაციიდან გამოვიდა. შეხვედრა 5 საათი და 40 წუთი გრძელდებოდა. მოჭადრაკეები 74-ე სვლაზე ყაიმზე შეთანხმდნენ.

ამრიგად, კარიაკინმა ერთქულიანი უპირატესობა შეინარჩუნა და დღეისათვის ანგარიშია 5:4 რუსი მოჭადრაკის სასარგებლოდ.

მეათე პარტია დღესაა დაგეგმილი.