საქართველოს ბერძნულ-რომაული სტილით მოჭიდავეთა ნაკრები ბუქარესტში გამართულ პრესტიჟულ გუნდურ შეჯიბრებაზე - "ევროპის ერთა თასზე” საპრიზო სამეულს მიღმა დარჩა. რუმინულ ხალიჩაზე სულ ექვსი ქვეყნის ნაკრები გავიდა, ისევე, როგორც გუშინ, თავისუფალი სტილით ჭიდაობაში. ბეგი დარჩიას გაწვრთნილი გუნდი B ჯგუფში მოხვდა, რუსეთისა და ბულგარეთის ნაკრებებთან ერთად. A ჯგუფში კი ერთმანეთს რუმინეთი, უკრაინა და პოლონეთი დაუპირისპირდნენ.

ქართველმა მოჭიდავეებმა ტურნირი ბულგარელებთან დაჭიდებით გახსნეს და 5:3 იმარჯვეს. შემდეგ კი, რუსებთან 1:7 წააგეს და ჯგუფში მეორე ადგილი დაიკავეს. A ჯგუფში სამეული ამ თანმიმდევრობით შეივსო: უკრაინა, რუმინეთი, პოლონეთი.

ტურნირის ფორმატის თანახმად, ჯგუფურ ეტაპზე მეორე ადგილზე გასული გუნდები ფინალურ ბლოკში ერთმანეთს ბრინჯაოს მედლისთვის დაეჭიდნენ. ქართველები შეჯიბრების მასპინძლებთან დამარცხდნენ და საბოლოოდ მეოთხე ადგილს დასჯერდნენ.

ჩემპიონი რუსეთი გახდა, უკრაინის ძლევით (6:2).

საქართველოს ნაკრები "ევროპის ერთა თასზე” შემდეგი შემადგენლობით გამოვიდა:

59 კგ - ირაკლი შავაძე

66 კგ - შმაგი ბოლქვაძე

71 კგ - მინდია წულუკიძე

75 კგ - გიორგი დათუნაშვილი და გელა ბოლქვაძე

80 კგ - ზურაბ დათუნაშვილი და ნიკოლოზ კელასოვი

85 კგ - რობერტ კობლიაშვილი

98 კგ - კუკური კირცხალია

130 კგ - იაკობ ქაჯაია