დღეს, თელ ავივში 23-წლამდელ ძიუდოისტთა ევროპის ჩემპიონატი იწყება და მასში მონაწილეობას საქართველოს ნაკრებიც მიიღებს. ვაჟთა გუნდი ისრაელში სრული შემადგენლობით - 9 სპორტსმენით გაემგზავრა, ახალგაზრდული ნაკრების ახალი მთავარი მწვრთნელის - ლაშა გუჯეჯიანის ხელმძღვანელობით. გოგონებში კი ევროკონკურენციაში ერთადერთი ქართველი ჩაებმება - მარიამ ჯანაშვილი, რომელიც 52 კილოგრამ წონით კატეგორიაში გამოვა.

განსაკუთრებით საინტერესოა 23-წლამდელთა განაცხადში ბექა ღვინიაშვილის გამოჩენა, რომელიც უკვე დიდი ხანია, ეროვნული ნაკრების წევრია. ასევე მნიშვნელოვანია ისიც, რომ ბექა უბრუნდება თავის წონით კატეგორიას - 90 კილოგრამს. ამავე წონაში დებიუტი ექნება ეროვნული ნაკრების კიდევ ერთ გამოცდილ წევრს უშანგი მარგიანს.

დღეს ევროპის ჩემპიონატზე ვაჟებში პირველ სამ წონით კატეგორიაში: 60, 66 და 73 კილოგრამებში გათამაშდება მედლები, გოგონები კი ოთხ წონაში: 48, 52, 57 და 63 კილოგრამებში შეავსებენ ევროპის სამეულებს. დანარჩენი მედლები ხვალ გათამაშდება.

საქართველოს ნაკრები

ვაჟები

60 კგ - თემურ ნოზაძე

66 კგ - თორნიკე ნაგლიაშვილი

73 კგ - გიგა გიგაური

81 კგ - ლევან გუგავა და კობა მჭედლიშვილი

90 კგ - უშანგი მარგიანი და ბექა ღვინიაშვილი

100 კგ - ლაშა ტაველური

+100 კგ - გურამ თუშიშვილი

გოგონები

52 კგ - მარიამ ჯანაშვილი