ინგლისური “მანჩესტერ იუნაიტედის” მთავარი მწვრთნელი ჟოზე მოურინიო ევროპა ლიგაზე, როტერდამის “ფეიენოორდთან” მარცხში მსაჯებს ადანაშაულებს. პორტუგალიელი სპეციალისტის განცხადებით, მეტოქემ გოლი თამაშის წესების დარღვევით გაიტანა და თან იმ დროს, როდესაც “მანჩესტერს” შეხვედრაში საუკეთესო პერიოდი ედგა.

“მატჩს სრულად ვაკონტროლებდით, გამარჯვებისთვის ვემზადებოდით, “ფეიენოორდს” პრობლემებს ვუქმნიდით, ასევე ფიზიკურად – სწორედ ამ მომენტში კი, თამაში წავაგეთ. მეტოქის ერთადერთი კონტრშეტევა გოლით დასრულდა. ორმაგად არ გაგვიმართა: გოლი მაშინ გაიტანეს, როდესაც შეხვედრაში ჩვენთვის საუკეთესო მომენტი იდგა და თან წესების დარღვევით. ჰოლანდიელებმა გოლი თამაშგარედან გაიტანეს”, - განაცხადა მოურინიომ.

საერთოდ, პორტუგალიელი სპეციალისტისთვის წუწუნი უცხო ხილი არაა და ამ საქმეს ხელი “იუნაიტედშიც” მიჰყო. “განსაკუთრებულმა” გუშინდელი მარცხის დარად, პრემიერლიგის ბოლო ტურში “სიტისთან” მარცხიც მსაჯებს გადააბრალა...