იზმირში დასრულდა მაჰმუდ ატალაის და იაშარ ერკანის სახელობის საერთაშორისო ტურნირი ჭაბუკთა შორის ჭიდაობის სამივე დისციპლინაში, სადაც მონაწილეობა 15 ქვეყნის 500-ამდე სპორტსმენმა მიიღო, საქართველოს ნაკრებებმა კი ჯამში 15 მედალი მოიპოვეს.

ბერძნულ-რომაული ნაკრებიდან ტურნირის გამარჯვებულები ირაკლი ძიმისტარაშვილი (54), ლერი აბულაძე (58) და გიორგი ქაცანაშვილი (85) გახდნენ, ვერცხლის მედლები ლევან გოგუამ (69) და ზაზა სილაგაძემ (100) მოიპოვეს, ბრინჯაოს მედლებს კი გიორგი შოთაძე (54), ბექა გურული (69), ოთარი აბულაძე (58) და ბექა ბეშიძე (63) დაეუფლნენ.

საერთო გუნდურ ჩათვლაში ჩვენმა ნაკრებმა მეორე ადგილი დაიკავა. პირველზე მასპინძელი თურქეთი გავიდა, მესამეზე – ყაზახეთი. გუნდის მწვრთნელები ვაჟა კრავეიშვილი და მამუკა სულთანიშვილი იყვნენ.

ლერი აბულაძემ (58) ფინალში თურქი აჰმეტ ალტანი 2:50 წუთში ქულების აშკარა უპირატესობით 10-0 დაამარცხა. ამავე წონაში ბრინჯაოს მედალი მისმა ძმამ ოთარ აბულაძემ მოიპოვა, რომელმაც თურქი მეტოქე ასევე აშკარა უპირატესობით, 2:48 წუთში, 15-5 დაამარცხა. ძიმისტარაშვილმა (54) ფინალში თურქი საიდან აბდულკადირი 6-1 დაამარცხა. ქაცანაშვილმა (85) გადამწყვეტ შეხვედრაში თურქ ტან ბედირჰანს 5-1 სძლია.

თავისუფალთა ნაკრებიდან ტურნირის გამარჯვებული გიორგი გეგელაშვილი (42) გახდა რომელმაც ფინალში ყაზახი შიხაირ შაბონოვი 3-2 დაამარცხა. ვერცხლის მედალი მიხეილ ბოჭორიძემ (76) მოიპოვა, ბრინჯაოს მედლის მფლობელები კი გიორგი ბრეგვაძე (76), რამაზ თურმანიძე (54) და ლაშა ბაირამოვი (85) გახდნენ.

გუნდურ ჩათვლაში თავისუფალთა ნაკრებმა მესამე ადგილი დაიკავა. მთავარი მწვრთნელი გიორგი იანტბელიძე იყო, მწვრთნელები – ლაშა ქეთიშვილი და კახაბერ დობორჯგინიძე.

გოგონათა ნაკრებიდან ისტორიული გამარჯვება მოიპოვა თამარ ხოჯაშვილმა (52), რომელიც პირველი ქართველი გოგონა გახდა, ვინც საერთაშორისო ტურნირზე გაიმარჯვა. მან პირველ შეხვედრაში 2:49 წუთში წმინდად დაამარცხა ყაზახი აბენ დარიგა, ნახევარფინალში ასევე წმინდად 25 წამში მოუგო თურქ მეტოქეს, ფინალში კი დაძაბულ ბრძოლაში 10-9 დაამარცხა მასპინძელი ედა ტეკინი. გოგონათა ნაკრების მთავარი მწვრთნელი ბესიკ გუჩაშვილი გახლდათ.

www.wrestling.ge