იტალიურმა “მილანმა” კაპიტან რიკარდო მონტოლივოს ახალი კონტრაქტი 2019 წლის 30 ივნისამდე გაუფორმა. ამის შესახებ ლომბარდიული გრანდის ვებგვერდი იტყობინება. მონტოლივოს გარდა, ამავე ვადით “როსონერიში” დარჩებიან მცველები ლუკა ანტონელი და დავიდე კალაბრია.

“მილანი” იუწყება, რომ რიკარდო მონტოლივოსთან, დავიდე კალაბრიასთან და ლუკა ანტონელისთან კონტრაქტები 2019 წლის 30 ივნისამდე გახანგრძლივდა”, - წერს შავ-წითელთა ვებგვერდი.

31 წლის მონტოლივო “მილანს” 2012 წელს “ფიორენტინადან” შეუერთდა და გასულ სეზონში მოედანზე იტალიის ჩემპიონატში 31-ჯერ გავიდა, თუმცა გოლი არ გაუტანია. რაც შეეხება ანტონელისა და კალაბრიას – პირველი მათგანი 29 წლისაა და “როსონერის” სკოლის აღზრდილია, მაგრამ “სან სიროზე” მხოლოდ 2015 წლის ზამთარში “ჯენოადან” დაბრუნდა. 19 წლის კალაბრია კი “მილანში” პირველად წლეულს გამოჩნდა და გუნდის შეფებს თავი მოაწონა. იგი მთლიანობაში მოედანზე რვა მატჩში გავიდა.