საქართველოს ძიუდოისტთა ნაკრების მძიმეწონოსანი ადამ ოქრუაშვილი ალმათის გრან პრის ფინალში გავიდა და ოქროს მედალს და საჩემპიონო 300 სარეიტინგო ქულას აზერბაიჯანის ნაკრების წევრ უშანგი კოკაურის ძლევა აშორებს. ასევე +100 კილოგრამში მოჭიდავე ლევან მატიაშვილი კი რეპეშაჟის ფინალშია. პოდიუმის უმაღლეს საფეხურზე ასვლის შანსი მატიაშვილმა ნახევარფინალში დაკარგა, სწორედ ოქრუაშვილთან წაგებით. ქართული დაპირისპირების ბედი გაფრთხილებებმა გადაწყვიტა (4:1).

ბრინჯაოსთვის ბრძოლაში ლევან მატიაშვილის მეტოქე ტუნისელი ფაიცელ ჯაბალა იქნება.

დღეს ყაზახურ ტატამზე კიდევ ოთხი ქართველი გავიდა: ზვიად გოგოჭური, ნოდარ ბერიანი (ორივე 90 კგ), რეზო წულუკიძე და ალექსანდრე ზაალიშვილი (ორივე 100 კგ). ოთხივემ მხოლოდ თითო ეტაპი დაძლია.

ფინალური ბლოკის შეხვედრები თბილისის დროით 15:00 საათიდან დაიწყება.