იტალიის სერია A-ს ბინადარმა მილანის “ინტერმა” ახალი სეზონისთვის პირველი შენაძენი განახორციელა. როგორც თურქული მედია წერს, “ჯუზეპე მეაცაზე” სტამბოლის “ფენერბაჰჩეს” ნახევარმცველი ჩანერ ერკინი გადაბარგდება.

მხარეებს შორის შეთანხმება უკვე მიღწეულია და თურქი ფეხბურთელი ლომბარდიულ გრანდთან კონტრაქტს ოფიციალურად 19 მაისს გააფორმებს. ერკინი “ნერაძურის” ღირსებას მომდევნო სამი წლის განმავლობაში დაიცავს, ხოლო მისი ტრანსფერი იტალიელებს 7.5 მილიონი ევრო დაუჯდათ.

27 წლის ჩანერ ერკინი “ფენერბაჰჩეში” 2011 წლიდან მოყოლებული თამაშობს. მიმდინარე სეზონში კი მან დედაქალაქური გუნდის ღირსება 13 შეხვედრაში დაიცვა, თუმცა გოლი არ გაუტანია.

აღნიშნული ტრანსფერის შესახებ თავად ფეხბურთელმაც ისაუბრა:

“ჩემთვის ეს ოცნების ასრულებაა. მინდა, რომ “ინტერში” რაც შეიძლება დიდი ხანი ვითამაშო. ბავშვობიდანვე ვუყურებდი “ნერაძურის” თამაშებს და ახლა მეც ამ გუნდის ერთ-ერთი წევრი ვარ. მაქსიმუმ გავიღებ ამ ახალ გამოწვევაში”, - თქვა ერკინმა turksvoetbal-თან საუბრისას.