იტალიის ეროვნული ნაკრები, შესაძლოა, ევროპის ჩემპიონატზე კიდევ ერთი წამყვანი ნახევარმცველის გარეშე დარჩეს. როგორც გამოცემა “გაძეტა დელო სპორტი” იტყობინება, მარკო ვერატი ოთხშაბათს “პარი სენ ჟერმენის” ვარჯიშზე შეუძლოდ გახდა. წყაროს ცნობით, ვერატის საზარდულის ტრავმა აწუხებს და ჯერჯერობით უცნობია თუ რა პერიოდი გაუცდება დაზუსტებით. “გაძეტას” გამოთვლებით, ევროპის ჩემპიონატისთვის ახალგაზრდა ნახევარმცველის გამოჯანმრთლების შანსი მხოლოდ 30%-ს უტოლდება.

მოკლედ, ანტონიო კონტეს საფიქრალი არ აკლდება. თუ ვერატიმ მწყობრში ჩადგომა ვერ მოასწრო, მაშინ იგი “სკუადრა აძურას” მეორე ძირითადი ნახევარმცველი იქნება, რომელიც საფრანგეთში ვერ ითამაშებს. პირველი მოგეხსენებათ, კლაუდიო მარკიზიოა.

იტალიურ მედიაში ვერატის შესაძლო შემცვლელად დანიელე დე როსი ესახებათ, რომელსაც კონტე ბოლო დროს აღარ სწყალობდა და დიდი ალბათობით არც ევროპის ჩემპიონატზე უპირებს წაყვანას.