10 აპრილს ძიუდოს აკადემიაში სტარტს აიღებს საქართველოს საკლუბო ჩემპიონატი უფროსებს შორის. ეს ტურნირი ერთ-ერთია ფედერაციის მიერ შემუშავებული მრავალრიცხოვან ნოვაციათაგან და მას დიდი ინტერესით ელის ქართული ძიუდოს სამყარო, რადგან აღნიშნული წამოწყება შეიძლება რევოლუციური გამოდგეს არა მხოლოდ ძიუდოში, არამედ მთლიანად ქართულ სპორტში.

ჩემპიონატის ჩატარების იდეა იმაში მდგომარეობს, რომ მთელი წლის განმავლობაში როგორც წამყვან, ასევე სათადარიგო სპორტსმენებს არ მოაკლდეთ საშეჯიბრო პრაქტიკა, მუდმივად იყვნენ ფორმაში და ფინანსური კუთხითაც შეძლონ მომძლავრება.

შეჯიბრში მონაწილეობს 7 გუნდი: "შევარდენი 2005", “ლიდერი”, “მებრძოლი 2015” (ყველა თბილისი), "ვიპ-ძიუდო" და "ლომჭაბუკი" (ორივე გორი), ქარელის "დურმიშხანი" და გურჯაანის "გლადიატორი".

გუნდების შემადგენლობები

წარდგენილი ძიუდოისტების ჩამონათვალის მიხედვით დარწმუნებით შეიძლება ითქვას, რომ უაღრესად საინტერესო სანახაობას უნდა ველოდეთ.

თითოეულ გუნდში არიან სპორტსმენები 7 წონითი კატეგორიიდან: 60კგ, 66კგ, 73კგ, 81კგ, 90კგ, -100კგ და +100კგ.

თავდაპირველად დაანონსებულ სიებში ორი ცვლილება განხორციელდა . სამწუხაროდ, კვირას თბილისის ტატამზე ვერ ვიხილავთ საქართველოს ეროვნული ნაკრების წევრებს ამირან პაპინაშვილს (60 კგ) და უშანგი მარგიანს (81 კგ).

პაპინაშვილი თავის წონაში ოლიმპიადაზე წამსვლელ მთავარ კანდიდატად განიხილება და სხვა პირველ ნომრებთან ერთად ინდივიდუალური გრაფიკით ემზადება, ხოლო რაც შეეხება მარგიანს, იგი ამ ბოლო დროს წონის კლების პრობლემას უჩიოდა.

გულშემატკივრები ბოლო პერიოდში სპორტსმენის ნაკლებად წარმატებულ გამოსვლებს სწორედ ამით ხსნიდნენ, რაც მოვლენების განვითარებამ დაადასტურა კიდეც - თბილისის გრან პრი-ზე დასუსტებული მარგიანი პირველივე შეხვედრაში დამარცხდა, იქედან ერთი კვირის თავზე კი სამსუნში უკვე მისთვის ახალ, 90 კგ კატეგორიაში იჭიდავა.

ვერ ვიტყვით მომავალში მარგიანი საბოლოოდ ახალ წონაში დამკვიდრდება თუ ისევ ძველ, 81 კგ-ს დაუბრუნდება, მაგრამ ზეგინდელ საკლუბო ჩემპიონატში ის სავარაუდოდ მონაწილეობას არ მიიღებს.

საქმე იმაშია, რომ უშანგი ამ ტურნირისთვის იმთავითვე 81 კგ-ში დარეგისტრირდა და შესაბამისად სხვაგან ვერ დადგება.

ერთადერთი შეღავათი მისთვის შეიძლება ეს იყოს : ორგანიზატორებმა გაითვალისწინეს კარს მომდგარი სხვა შეჯიბრების აქტუალურობაც და სპორტსმენთათვის ანგარიშგასაწევ პირობას დათანხმდნენ - იქნება წონის დაშვება +2 კგ.

პაპინაშვილის და მარგიანის დანაკლისი მნიშვნელოვანია ( მათ სხვა ძიუდოისტები ჩაანაცვლებენ სარეზერვო სიებიდან), თუმცა ვფიქრობთ სატურნირო შემადგენლობა მაინც ძალიან სოლიდურია. ეროვნული ნაკრების მეორე ნომრები, ახალგაზრდული ნაკრების წამყვანი სახეები უდიდეს ინტერესს სძენენ ჩემპიონატს.

კენჭისყრა გაიმართება 9 აპრილს, რის შედეგადაც გაირკვევა შეხვედრების თანმიმდევრობა და განრიგი. მათ შორის ისიც, თუ რომელი გუნდები დაუპირისპირდებიან ერთმანეთს კვირა დღეს დაგეგმილ პირველ ორ ტურში.

შეჯიბრი როგორც აღვნიშნეთ, ჩატარდება 10 აპრილს და გაიმართება I საკვალიფიკაციო ეტაპის საწყისი ორი ტური. დასაწყისი 10:00 საათზე.

ტურნირს სპორტული მხარის გარდა ერთი დიდი ინტრიგაც ახლავს თან: სოლიდური საპრიზო ფონდი ( მხოლოდ პირველი საშეჯიბრო დღის ბიუჯეტი 49 000 ლარია ).

ნებისმიერ გუნდს მისი თითოეული სპორტსმენის ყოველ მოგებულ შეხვედრაზე დაერიცხება 1000 ლარი, რაც იმას ნიშნავს, რომ არც ერთი ორთაბრძოლა არ იქნება იოლად გასავლელი.

ამის გათვალისწინებით ადვილი მისახვედრია, ქართული სპორტისთვის თუ როგორი ისტორიული მოვლენის წინ ვდგავართ და რაოდენ უშეღავათო ორთაბრძოლების მომსწრე შეიქნება ძიუდოს აკადემიაში მისული გულშემატკივარი.