საქართველოს 19-წლამდელთა ნაკრებმა ევროპის ჩემპიონატის ელიტრაუნდის პირველი მატჩი ინგლისთან 1:2 წააგო.

ესპანეთში "ესტადიო ლუის როდრიგეს სალვადორზე" გამართულ შეხვედრაში ანგარიში მე-8 წუთზე, ლონდონის "ჩელსის" ახალგაზრდული გუნდის თავდამსხმელმა ტამი აბრაჰამმა ჯოშუა ონომაჰის გადაცემის შემდეგ გახსნა. ორ წუთში საგოლე პასის და გოლის ავტორებმა როლები გაცვალეს და "ტოტენჰემის" ნახევარმცველმა მეორე გოლი გაიტანა. 84-ე წუთზე ქართველთა მხრიდან ირაკლი ბიძინაშვილის გადაცემით თავი გურამ გოშთელიანმა გამოიჩინა.

უეფას 19-წლამდელთა ელიტრაუნდის პირველი ჯგუფის შეხვედრებს ესპანეთი მასპინძლობს. ლუის დე ლა ფუენტეს შეგირდებმა პირველ მატჩში ბერძენი თანატოლები 2:0 დაამარცხეს. მომდევნო შეხვედრას გიორგი ყიფიანის გუნდი ესპანეთთან 26 მარტს გამართავს. ჯგუფიდან ფინალურ ეტაპზე პირველადგილოსანი გადის.

ინგლისი: ვუდმენი, ტეილორ მური, კუკი, ამსტრონგი, აბრაჰამი, ბრაუნი (ოჯო 79), უოლკერ-პიტერსი, ონომაჰი (კონოლი 79), ფრაი, მოორი, მაიტლანდ-მილსი.

მწვრთნელი: ადრიან ბუსროიდი

საქართველო: გოშაძე, ჩაჩუა, ლოჩოშვილი, ჭიჭინაძე, მამუჩაშვილი, ალთუნაშვილი (სამურკასოვი 75), ბერიძე (ბიძინაშვილი 59), გოშთელიანი, მიქელთაძე, არაბიძე (არდაზიშვილი 59), კომახიძე.

მწვრთნელი: გიორგი ყიფიანი