ჯანლუიჯი ბუფონმა მორიგი რეკორდი რომ დაამყარა, გუშინაც ვწერდით. ჯიჯიმ გოლი მიჯრით 974 წუთის განმავლობაში არაფრით გაუშვა. მან სებასტიანო როსის რეკორდი მოხსნა, არადა, “მილანის” ყოფილი კიპერის მიღწევა ხელშეუხებელი 8 057 დღის განმავლობაში იყო...

ჯიჯიმ მშრალად 10 თამაში ჩაატარა და ხსენებულ შეხვედრებში სეივი 22-ჯერ შეასრულა.

ახლა, ბუფონი სამშობლოში ლიდერია და ძნელად სავარაუდოა, უახლოეს მომავალში მისი შედეგი ვინმემ გააუმჯობესოს.

რაც შეეხება ტოპ 5 ჩემპიონატის (პრემიერლიგა, ლა ლიგა, ბუნდესლიგა, ლიგა 1, სერია A) შედეგებს, პირველ პოზიციაზე ედვინ ვან დერ სარია. ჰოლანდიელმა 2008-2009 წლების სეზონში გოლი 1311 წუთის განმავლობაში არ გაუშვია.

ბუფონი მეხუთე ადგილზეა. აქვე, ხუთეული...

რაც შეეხება აბსოლუტურ რეკორდს, ბელგიის ჩემპიონატშია დამყარებული – “ბრიუგეს” კარის დარაჯმა დანი ვერლინდენმა 1990 წლის 3 მარტიდან 26 სექტემბრამდე კარი მშრალად შეინახა, 1390 წუთის განმავლობაში.

დავუბრუნდეთ ბუფონს და “იუვენტუსს”: მიმდინარე სეზონში “ბებერმა ქალბატონმა” თავისი კაპიტნის დამსახურებით კარი მშრალად 17 თამაშში შეინახა. ამ მაჩვენებლით “იუვეს” და ჯიჯის მხოლოდ მადრიდის “ატლეტიკო” და იან ობლაკი სჯაბნიან – 19 მატჩი. ჰო, ჯიჯის კიდევ ერთი საინტერესო რეკორდი ეკუთვნის; სერია A-ში 257 თამაში აქვს ჩატარებული, ისე რომ გოლი არ გაუშვია...