"დიდი 10" მე-12 ტურის გადადებული მატჩით განახლდა და მასში ბოლნისის “ყოჩებმა” ქუთაისის “აიას” 27:20 აჯობა, რითაც მოწინავე ექვსეული დანარჩენ ოთხეულს კიდევ უფრო დაშორდა.
“ყოჩებმა” თამაში ექსპერიმენტული შემადგენლობით და განლაგებით რომ დაიწყო, პირველ ტაიმში კარში დამრტყმელი პრაქტიკულად არ ჰყავდა და პირველივე წუთებიდან მხოლოდ ლელოზე თამაშობდა. ბოლნისელები სათამაშო და ტერიტორიულ უპირატესობას ფლობდნენ, მაგრამ ქულების აღებას ვერ ახერხებდნენ. ყველაზე კარგი სალელოვე შანსი ლევან გოგოლაშვილს მიეცა, რომელმაც კონტრშეტევისას საკუთარი 22-ის ხაზიდან მეტოქის ლელოს 5-მეტრა ხაზამდე ირბინა, მაგრამ იქ იოსებ კიკვაძემ შებოჭა. ამ ეპიზოდს ლელო მაინც მოყვა, რადგან “აია” დაჯარიმდა და “ყოჩებმაც” შერკინებიდან შეუტია, რამდენიმე დარტყმის შემდეგ გიორგი ბეგაძემ გრძელი გადაცემით ფლანგზე ალექსი ხუციშვილი მოძებნა, მერე ახლოდან გიორგი ტყეშელიაძემ დაარტყა, ირაკლი სვანიძე კი, ბურთიანად ლელოში შევიდა. გოგოლაშვილს გარდასახვა გაუცუდდა.
საწყისი 20 წუთის შემდეგ ინიციატივას უკვე “აია” დაეუფლა და რეზი ჯინჭველაშვილმა 22-ე წუთზე ჯარიმით ჩამორჩენა შეამცირა. მერე იოსებ კიკვაძეს ორი შორეული არეკნი გაუცუდდა და თამაშიც საბოლოოდ გაიხსნა. ორივე გუნდის მორაგბეებმა რამდენჯერმე გაჭრეს, მაგრამ ლოგიკური გაგრძელება არცერთ შეტევას არ მოყვა. ტაიმის მიწურულს “ყოჩებმა” ჯარიმის შესრულების უფლება რომ მოიპოვა კარში დარტყმა ბეგაძემ გადაწყვიტა და 5-ქულიანი უპირატესობა აღადგინა, თუმცა, სულ ბოლოს ქუთაისელებმა მეტოქის ლელოდან 5 მეტრში სწრაფად რომ გაითამაშეს ჯარიმა, რაქიდან ბურთი გიორგი ტორაძემ მიიღო და ლელოთი ანგარიში გაათანაბრა, ხოლო ჯინჭველაშვილმა სტუმრებს ტაიმი 10:8 მოაგებინა.
მეორე ტაიმის დებიუტში ქუთაისელები ორჯერ შეცდნენ და თუ პირველ ჯერზე იოლად გადარჩნენ, მეორე შემთხვევაში გიორგი ხარშილაძემ მიწიდან ასხლეტილი ბურთი მცველებს ცხვირწინ ააცალა და ლელომდე 20 მეტრი ირბინა, ხოლო შეცვლაზე შესულმა თემურ სოხაძემ გარდასახვა შეასრულა. ჯინჭველაშვილმა ჯარიმით ჩამორჩენა მალევე შეამცირა, სოხაძეს დარტყმა არ გამოუვიდა, 56-ე წუთზე კი, “აია” კიდევ ერთხელ დაწინაურდა. ქუთაისელებმა საკუთარი დერეფანი მოიგეს, ბურთი ბოლომდე ჩაათამაშეს და კიკვაძე მცველებს დაუსხლტა, ხოლო ჯინჭველაშვილმა გარდასახვით ანგარიში 20:15 გახადა.
დასკვნითი 20 წუთი ბოლნისელების იყო, სოხაძემ ჯერ ჯარიმით შეამცირა ჩამორჩენა, ხოლო 70-ე წუთზე არეკნი გაიტანა და “ყოჩები” 21:20 დაწინაურდა. ამ პერიოდში ერთი ჯარიმა ჯინჭველაშვილს გაუცუდდა, ხოლო ლოსაბერიძის გარღვევის შემდეგ აბრამიძემ ბურთი ვერ შეიმაგრა. არეკნმა ქუთაისელები აანერვიულა, შეცდომების დაშვებას მოუხშირეს, სოხაძემ მათ ერთხელ შეცდომა აპატია, მაგრამ შემდეგ ორ ჯერზე ზუსტი იყო და საკუთარ გუნდს 27:20 მოაგებინა.
საქართველოს XXVI ეროვნული ჩემპიონატი. დიდი 10. XII ტური (გადადებული)
ყოჩები (ბოლნისი) - აია (ქუთაისი) 27:20 (8:10)
ყოჩები: 15. ხუციშვილი, 14. ნიჟარაძე, 13. ხარშილაძე, 12. ცერცვაძე, 11. ცირეკიძე, 10. გოგოლაშვილი, 9. ბეგაძე (კაპ.); 1. გოგიშვილი, 2. სვანიძე, 3. შენგელია, 4. არჩუაშვილი, 5. გრძელიშვილი, 6. გაჩეჩილაძე, 7. ტყეშელიაძე, 8. ჩხიკვაძე.
სათადარიგოები: 16. ჯაშიტაშვილი, 17. ხოსიტაშვილი, 18. ცუცქირიძე, 19. ეფრემიძე, 20. გუგეშაშვილი, 21. სოხაძე, 22. გარუჩავა, 23. ხიდეშელი.
2 ლელო: ირაკლი სავნიძე, გიორგი ხარშილაძე
1 გარდასახვა: თემურ სოხაძე
4 ჯარიმა: გიორგი ბეგაძე, სოხაძე (3)
1 არეკნი: სოხაძე
აია: 15. კიკვაძე, 14. თორაძე, 13. ფრუიძე, 12. სინაურიძე, 11. აბრამიძე, 10. ჯინჭველაშვილი, 9. თუთბერიძე; 1. რატიაშვილი, 2. მატკავა, 3. ტორაძე, 4. ა. ჩიტეიშვილი, 5. გ. ჩიტეიშვილი, 6. სალდაძე, 7. მარშანია, 8. ლოსაბერიძე (კაპ.).
სათადარიგოები: 16. წაქაძე, 17. ტორაძე, 18. მატარაძე, 19. კუხიანიძე, 20. მაჩალაძე, 21. კიკვაძე, 22. ირემაძე, 23. მოდებაძე.
2 ლელო: გიორგი ტორაძე, იოსებ კიკვაძე
2 გარდასახვა: რეზი ჯინჭველაშვილი
2 ჯარიმა: ჯინჭველაშვილი
| 23/01 | კლუბი ქალაქი | თ | მ | ფ | წ | +პ | +ნ | -დ | გატ:გაშ | სხვ | ლ | ქ |
| 1 | ლელო სარასენს თბილისი | 12 | 9 | 1 | 2 | 2 | 1 | 0 | 221:165 | +56 | 23/14 | 41 |
| 2 | ბათუმი ბათუმი | 12 | 8 | 1 | 3 | 1 | 3 | 0 | 201:158 | +43 | 16/06 | 38 |
| 3 | ლოკომოტივი თბილისი | 12 | 8 | 0 | 4 | 1 | 4 | 0 | 225:172 | +53 | 22/12 | 37 |
| 4 | ჯიქი გორი | 12 | 7 | 1 | 4 | 3 | 2 | 0 | 193:135 | +58 | 22/09 | 35 |
| 5 | აია ქუთაისი | 12 | 7 | 1 | 4 | 1 | 2 | 0 | 198:170 | +28 | 14/12 | 33 |
| 6 | ყოჩები ბოლნისი | 12 | 7 | 0 | 5 | 1 | 3 | 0 | 205:189 | +16 | 16/16 | 32 |
| 7 | აკადემია თბილისი | 12 | 5 | 0 | 7 | 0 | 3 | 0 | 114:168 | -54 | 07/17 | 23 |
| 8 | ხარები რუსთავი | 12 | 4 | 0 | 8 | 0 | 4 | 0 | 141:197 | -56 | 11/22 | 20 |
| 9 | არმია თბილისი | 12 | 2 | 1 | 9 | 0 | 6 | 0 | 195:268 | -73 | 13/31 | 16 |
| 10 | არმაზი თბილისი | 12 | 0 | 1 | 11 | 0 | 7 | 0 | 152:223 | -71 | 13/18 | 9 |
| ^ უკეთესი პირისპირ ბალანსით, % ნაკლები თამაშის გამო | 23/01 @ 16.35 |
| ქულათა ნიხრი ბაზისი: მოგება 4, ფრე 2, წაგება 0 +1 ბონუსი = პრემია ან ნუგეში | |
XIII ტური. 30-31 იანვარი
ბათუმი - აკადემია, ყოჩები - ხარები, აია - ლოკომოტივი, არმაზი - ლელო-სარასენსი, ჯიქი - არმია
