“ჩემპიონობისთვის ლიდერი გუნდების დამარცხებაა საჭირო და ეს შეუძლებელი არაა” – ასეთი განცხადება გააკეთა “მანჩესტერ იუნაიტედის” მთავარმა მწვრთნელმა ლუის ვან გაალმა დღევანდელ მატჩისწინა პრესკონფერენციაზე.

“პრობლემა მხოლოდ ჩვენ მაღლა მდგომი 4 გუნდია. საჭიროა მათი დამარცხება და ჩემპიონი გახდები. რთული იქნება, მაგრამ წარმოუდგენელი არაა. გუნდს უნდა სჯეროდეს და შანსები რეალური გახდება. ლიდერები დიდი მობილიზებით თამაშობენ და თუ მათ დამარცხებას შევძლებთ, შანსი გაიზრდება.” – განაცხადა ვან გაალმა.

“წითელი ეშმაკები” პრემიერლიგაში 22 ტურის შემდეგ 37 ქულით მე-5 ადგილზე იმყოფებიან. “მანჩესტერი” ლიდერ გუნდებს “არსენალს” და “ლესტერს” 7 ქულით ჩამორჩება. 23 იანვარს ლუისის შეგირდები შინ “საუთჰემპტონს” მიიღებენ, მატჩი თბილისის დროით 19:00 საათზე დაიწყება.