საქართველოს პირველი ჩოგანი ნიკოლოზ ბასილაშვილი, რომელიც ავსტრალიის ღია პირველობის ძირითად ბადეში სათამაშოდ ემზადება, მომავალი კვირიდან კაბნერას ჩელენჯერში (საპრიზო ფონდი 75 ათასი დოლარი) ჩაებმება.

CANBERRA ATP CHALLENGER-ის პირველ რაუნდში ბასილაშვილის მეტოქე ნაკლებადცნობილი ავსტრალიელი ენდრიუ უიტინგტონი იქნება. ცნობისთვის, ამ უკანასკნელს რეიტინგში 592-ე ადგილი უკავია, ნიკოლოზი კი მსოფლიოს 113-ე ჩოგანია.

თუკი ბასილაშვილმა საწყისი ბარიერი დასძლია, 8 სარეიტინგო ქულას მიიღებს, მერვედფინალში კი ძალებს მე-8 ნომრად განთესილ იაპონელ ტარო დანიელსა და ფრანგ კუენტინ ჰალისს შორის უმჯობესთან მოსინჯავს.

კანბერას ჩელენჯერის გამარჯვებული 90 ქულას და 10 800 დოლარს მიიღებს.