ჩეხეთის კალათბურთი აღმავლობის გზაზე დგას. ამ ქვეყნის ნაკრებმა ევროპის 2015 წლის ჩემპიონატზე თავისი შესაძლებლობის მაქსიმუმი გამოავლინა და ბებერი კონტინენტის გრანდებთან ჭიდილში მეოთხედფინალში ასპარეზობის უფლება მოიპოვა. მეშვიდე ადგილისათვის ბრძოლაში კი ლატვია დაამარცხა და 2016 წლის ზაფხულის ოლიმპიადის ერთ-ერთი საგზურისათვის ბრძოლას აგრძელებს. რაღა თქმა უნდა, ნაკრების ამ წარმატებაში გამორჩეული წვლილი მთავარ მწვრთნელს რონენ გინზბურგს მიუძღვის, რომელიც პარალელურად ჩეხურ საკალათბურთო კლუბს - ვთბ ლიგაზე მოასპარეზე ,,ნიმბურკს’’ ხელმძღვანელობს.

შეგახსენებთ, რომ ევრო-2015-ის შესარჩევ ეტაპზე საქართველოს ნაკრების ერთ-ერთი მეტოქე ჩეხეთის ნაკრები იყო.

გთავაზობთ ინტერვიუს გინზბურგთან, რომელსაც ვთბ ლიგაზე ,,ვითა’’-,,ნიმბურკის’’ მატჩის დასრულების შემდეგ ვესაუბრეთ.

- ამ სეზონში რომელ გუნდს თვლით ვთბ ლიგის ფავორიტად?

- მოსკოვის ,,ცსკა“-ს, რომლის ბიუჯეტიც 40 მილიონ ევროს შეადგენს.

- თქვენი ბიუჯეტი რამდენია?

- ჩვენი ბიუჯეტი მხოლოდ ერთ მილიონ ევროს შეადგენს.

-აღნიშნულ ლიგაში თქვენი გუნდი რა მიზანს ისახავს?

- ამ ეტაპზე ჩვენი მიზანი 8 საუკეთესო გუნდში მოხვედრაა. დანარჩენს მომავალი გვიჩვენებს.

- რას გვეტყვით თქვენი ქვეყნის ნაკრებზე , რომელმაც ევრო 2015 -ის ფინალურ ეტაპზე მეშვიდე ადგილი დაიკავა?

- კარგად ვითამაშეთ და ჩეხეთის კალათბურთის ისტორიაში გამორჩეულ წარმატებას მივაღწიეთ.

- რამდენად რეალურად მიგაჩნიათ თქვენი გუნდის მიერ 2016 წლის ზაფხულის ოლიმპიური თამაშების საგზურის მოპოვება?

- ფიბაში შევიტანეთ განაცხადი, რათა ჩვენმა ქვეყანამ კალათბურთში 2016 წლის ზაფხულის ოლიმპიადის შესარჩევ ტურნირს უმასპინძლოს. თუ ფიბამ გაითვალისწინა ჩვენი მოთხოვნა, ჩვენს ნაკრებს რიო-დე-ჟანეიროს ( ბრაზილია ) ერთ-ერთი საგზურის მოპოვების ბევრად მეტი შანსი ექნება. მაქსიმალურად ვეცდებით, რომ ეს შანსი გამოვიყენოთ.

აქვე მინდა დავამატო, რომ საქართველოს კარგი ნაკრები ჰყავს. შესარჩევ ტურნირში მასთან შეხვედრისას თბილისში დავმარცხდით. მართალია, საკუთარ მოედანზე რევანში ავიღეთ და თანაბარი ქულები დავაგროვეთ, მაგრამ ბურთების უკეთესი შეფარდებით პირველ ადგილზე საქართველო გავიდა. ქართველ კალათბურთელებს ვუსურვებ წარმატებას. თბილისში თამაში ყოველთვის სასურველია და მომავალშიც დიდი სიამოვნებით გესტუმრებით.