საქართველოს 16 წლამდე ვაჟ კალათბურთელთა ნაკრები საერთაშორისო ტურნირის ,,ბალკანეთის ვარსკვლავის თასის’’ გათამაშებაში მონაწილეობის მისაღებად ემზადება, რომელსაც მიმდინარე წლის დეკემბრის მეორე ნახევარში რუმინეთის დედაქალაქი ბუქარესტი უმასპინძლებს.

16-წლამდელთა გუნდი ცოტა ხნის წინ ჩააბარეს კოტე ტუღუშს, რომელიც პარალელურად სუპერლიგის ერთ-ერთ საუკეთესო კლუბ ,,ქუთაისი-2010’’-ს ხელმძღვანელობს.

მომავალი ტურნირისა და გუნდის მზადების შესახებ კოტე ტუღუშმა „მსოფლიო სპორტთან’’ ისაუბრა.

- როგორ აღმოჩნდით ,,ბალკანეთის ვარსკვლავის თასის ‘’ გათამაშებაში?

- ამ ტურნირზე რუმინეთის კალათბურთის ფედერაციამ მიგვიწვია. შეჯიბრში 7 გუნდი მონაწილეობს, რომლებიც ორ ჯგუფად არიან გაყოფილი. ჩვენთან ერთად ჯგუფში ერთი ბულგარული და ორი რუმინული გუნდი ითამაშებს.

- საქართველოს ნაკრებში რამდენი კალათბურთელი გამოიძახეთ?

- ამჟამად გუნდში 22 კალათბურთელი გვყავს და კიდევ ვაპირებთ რამდენიმეს დამატებას. რუმინეთში კი 12 მოთამაშეს წავიყვანთ, რომელთა ვინაობას გამგზავრების წინ დავასახელებთ.

- როდის მიემგზავრებით?

- 16 დეკემბერს მივდივართ და 23-ში დავბრუნდებით.

- ახალგაზდა მოთამაშეებს როგორ შეაფასებთ, როგორი თაობა მოდის?

- არიან პერსპექტიული კალათბურთელებიც, მაგრამ ბევრი მუშაობაა საჭირო, რომ მათ დიდი კალათბურთი ითამაშონ.

-რას გვეტყვით „ქუთაისი 2010“-სა და „სოხუმის“ სამშაბათს გამართულ შეხვედრაზე?

- „სოხუმი“ მიმდინარე ეროვნული ჩემპიონატის ერთ-ერთი საუკეთესო გუნდია და ეს ამ თამაშზეც დაამტკიცა. პირველ წრეში ჩვენ მოვიგეთ , მეორეში კი მეტოქემ. ჩემპიონატში რამდენიმე თანაბარი ძალის გუნდი მონაწილეობს და გამოკვეთილი ფავორიტი არაა. აღნიშნულიდან გამომდინარე ჩემპიონობისათვის ბრძოლა კიდევ უფრო დაიძაბება.