საქართველოს წყალბურთელთა ეროვნულმა ნაკრებმა 25-27 სექტემბერს ისრაელში, ქალაქ ნეთანიაში გამართული 2016 წლის ევროპის ჩემპიონატის მეორე შესარჩევი ტური წარმატებით დაასრულა და ევროპის ჩემპიონატზე თამაშის უფლება ზედიზედ მეორედ მოიპოვა.

ისრაელიდან დაბრუნების შემდეგ, 30 სექტემბერს საქართველოს წყალბურთელთა ნაკრებსა და მწვრთნელებს, ფედერაციის ხელმძღვანელობასთან ერთად სპორტისა და ახალგაზრდობის საქმეთა მინისტრი ტარიელ ხეჩიკაშვილი და მინისტრის მოადგილე შალვა გოგოლაძე შეხვდნენ და წარმატება მიულოცეს.

ქართველმა წყალბურთელებმა შესარჩევი ტურის E ჯგუფში ფავორიტ ჰოლანდიასთან ფრედ 5:5 ითამაშეს, ხოლო ისრაელი და ლიტვა შესაბამისად 17:6 და 18:6 დაამარცხეს და ჯამში, 2 შესარჩევი ტურის შედეგად მოპოვებული მე-2 გამსვლელი ადგილით და 13 ქულით, სერბეთში გასამართ ევროპის ჩემპიონატზე მოხვდნენ, სადაც 16 უძლიერესი ნაკრები ითამაშებს.

შესარჩევი ეტაპის პირველ ტურში, რომელიც 6-8 თებერვალს თბილისში ჩატარდა, საქართველოს ნაკრებმა შვეიცარია (21:9) და პორტუგალია (21:3) დაამარცხა, სლოვაკეთთან კი 10:11 დათმო.

ევროპის ჩემპიონატი ბელგრადში 2016 წლის 10-23 იანვარს ჩატარდება, კენჭისყრა კი 4 ოქტომბერს გაიმართება, სადაც საქართველოს ნაკრების მეტოქეების ვინაობა გაირკვევა.

კენჭისყრამდე გუნდები კალათებში შემდეგნაირად გადანაწილდნენ

1 - სერბეთი, უნგრეთი, იტალია, ჩერნოგორია

2 - ხორვატია, საბერძნეთი, ესპანეთი, რუმინეთი

3 - რუსეთი, გერმანია, საფრანგეთი, ჰოლანდია

4 - მალტა, სლოვაკეთი, საქართველო, თურქეთი

ევროპის ჩემპიონატზე გამგზავრებამდე, 20 ოქტომბრიდან საქართველოს ნაკრები მსოფლიოს ლიგის გათამაშებაში ჩაებმება.

ევროპიდან ამ შეჯიბრებაში 12 გუნდი იასპარეზებს. გუნდები წილისყრით სამ ჯგუფში გადანაწილდნენ. საქართველოს ნაკრები A ჯგუფში უნგრეთს, რუმინეთსა და საბერძნეთს გაუწევს მეტოქეობას. პაექრობები გაიმართება ორ წრედ შინ და გარეთ თამაშის პრინციპით. B ჯგუფში ითამაშებენ სერბეთი, ჩერნოგორია, ესპანეთი და საფრანგეთი, ხოლო C ჯგუფში ხორვატია, იტალია, რუსეთი და თურქეთი.

საქართველოს ნაკრები მსოფლიო ლიგაზე პირველ მატჩს 20 ოქტომბერს უნგრეთში გამართავს. ამავე დღეს რუმინეთი საბერძნეთს უმასპინძლებს. მეორე ტურის პაექრობები 17 ნოემბერსაა დაგეგმილი. ჩვენები სტუმრად საბერძნეთს დაუპირისპირდებიან, უნგრელები რუმინელებს მიიღებენ.

1 დეკემბერი. საქართველო-რუმინეთი, საბერძნეთი-უნგრეთი. მეორე წრის შეხვედრები გაისად გაიმართება.

საქართველოს სპორტისა და ახალგაზრდობის საქმეთა პრესსამსახური