სერია A-ს მორიგ მატჩში “რომას” უბერებელმა კაპიტანმა ფრანჩესკო ტოტიმ “სასუოლოს” პირველი ტაიმის 36-ე წუთზე ანგარიში გაუყაიმა (2:2) და მშობლიური კლუბის მაისურათი ასპარეზობისას თავი მესამასედ გამოიჩინა.

გულშემატკივრების მიერ “იმპერატორად” შერაცხული ჩესკო “რომაში” 13 წლიდანაა, პირველ გუნდში დებიუტი კი 16 წლისას ჰქონდა, როდესაც სერბმა სპეციალისტმა ვუიადინ ბოშკოვმა “ბრეშიას” წინააღმდეგ ათამაშა (1993 წლის მარტი). მას შემდეგ მოყოლებული ტოტიმ საკლუბო დონეზე 300 გოლი გაიტანა, რომელთაგან 244 სერია A-ზე მოდის, 17 ბურთი მეტოქეთა კარში ქვეყნის თასზე შეაგდო, 38 ევროთასებზე და ერთიც იტალიის სუპერთასის შეხვედრაში. 38 წლის ტოტი საკუთარი ქვეყნის უპირველესი დივიზიონის რიგით მეორე გოლეადორია, პირველობას კი 275 ბურთით გასული საუკუნის 30-50-იანი წლების ბომბარდირი სილვიო პიოლა ინარჩუნებს. ამასთან, თუკი ფრანჩესკო “რომას” ერთგულია, პიოლას გოლები 5 კლუბის (“პრო ვერჩელი”, “ლაციო”, “ტორინო”, “იუვენტუსი”, “ნოვარა”) შემადგენლობაში ასპარეზობისას აქვს გატანილი.

“300 გოლი წარმოუდგენელი შედეგია. ამ შედეგს ველოდით, თუმცა, ფრანჩესკო თანახმა იქნებოდა, თავად არ გაეტანა და “რომას” მატჩი მოეგო. ჩვენ კაპიტანთან ერთად ტიტულის მოგება მწადია. ტოტისთვის “რომას” მაისურა მეორე კანად იქცა და იტალიის დედაქალაქში ჩესკო არანაკლებ პოპულარულია, ვიდრე რომის პაპი”, - განაცხადა რომაელთა მთავარმა მწვრთნელმა რუდი გარსიამ Reuters-თან საუბრისას.