პოპულარული გამოცემა AS მადრიდის “რეალის” გულშემატკივართათვის მეტად არასასიამოვნო ინფორმაციას ავრცელებს. “ბლანკოსს” უახლოესი 4 კვირის განმავლობაში კოლუმბიელი ფორვარდი ხამესი დააკლდება.

სანაკრებო პაუზის დროს ხამესი სამშობლოში გაემგზავრა და კოლუმბიის ნაკრების შემადგენლობაში ითამაშა. პერუს ეროვნულ გუნდთან ტესტ-მატჩში დაპირისპირებისას ახალგაზრდა ვარსკვლავმა ტრავმა მიიღო, რომელიც კოლუმბიელმა დასტაქარებმა ნაკლებსერიოზულ დაზიანებად მიიჩნიეს და ხამესის გამოჯანმრთელების ვადად 10 დღე დაასახელეს. ფეხბურთელის მადრიდში დაბრუნების შემდეგ ჩატარებულმა გამოკვლევამ კი ცხადყო, რომ ხამესი მინიმუმ ერთი თვის განმავლობაში ვერ მოახერხებს მინდორზე სათამაშოდ გასვლას. ეს კასტილიელთა დამრიგებელ რაფა ბენიტესს თავსატეხს გაუჩენს.

ასე და ამგვარად, მადრიდის “რეალს” პრიმერა დივიზიონის უახლოეს შეხვედრებში (“ესპანიოლი”, “გრანადა”, “მალაგა”, “ატლეტიკო”) ხამესის გარეშე მოუწევს თამაში. კოლუმბიელი ვერც “ბლანკოსის” საჩემპიონთალიგო 2 სასტარტო მატჩში მიიღებს მონაწილეობას. ჯგუფური ეტაპის საწყის შეხვედრებში სანტიაგო ბერნაბეულები დონეცკის “შახტარს” და შვედეთის “მალმეს” დაუპირისპირდებიან. უახლოეს მატჩს “რეალი” 12 სექტემბერს ბარსელონაში, იქაურ “ესპანიოლთან” ჩაატარებს.