სტივენ ჯერარდმა “ენფილდ როუდი” გასულ ზაფხულს დატოვა, ჯონ ფლენეგანი და ჯორდან როსიტერი ოლდ ტრაფორდელთა შორის კი ირიცხებიან, მაგრამ შაბათს მათი მინდორზე გასვლა ნაკლებსავარაუდოა, რაც იმას ნიშნავს, რომ პრემიერლიგის ისტორიაში პირველად “მანჩესტერ იუნაიტედისა” და “ლივერპულის” პრინციპულ დაპირისპირებაში ამ კლუბების არცერთი აღზრდილი მონაწილეობას არ მიიღებს.

გულშემატკივრები მინდორზე ლივერპულის საფეხბურთო სკოლის ერთადერთ წარმომადეგენ უეინ რუნის იხილავენ, თუმცა, ნებისმიერ გულშემატკივარს კარგად ახსოვს, რომ “შრეკი” “ევერტონის” აღზრდილია და პროფესიული კარიერაც ამ კლუბში დაიწყო.

ასევე ბოლო 16 წლის განმავლობაში პირველად ინგლისის 2 ყველაზე ტიტულოვანი კლუბის ურთიერთშეხვედრა ისე ჩაივლის, რომ მინდორზე არც სტივენ ჯერარდი იქნება და არც რაიან გიგზი.

პრემიერლიგის 4 ტურის შემდეგ “მანჩესტერ იუნაიტედსა” და “ლივერპულს” 7-7 ქულა აქვთ, ამასთან ბოლო მატჩები როგორც ლუის ვან გაალის, ასევე ბრენდან როჯერსის გუნდმა წააგო – მანკუნიანელები უელსში “სუონსისთან” 1:2 დამარცხდნენ, ხოლო მერსისაიდელები საკუთარ “ენფილდ როუდზე” აღმოსავლეთლონდონის “ვესტ ჰემთან” 0:3 შერცხვნენ.

ჩრდილო-დასავლურ დერბად წოდებული “მანჩესტერისა” და “ლივერპულის” დაპირისპირება 12 სექტემბერს საქართველოს დროით 20 საათსა და 30 წუთზე დაიწყება.