საქართველოს ეროვნული ნაკრების მთავარმა მწვრთნელმა კახა ცხადაძემ შოტლანდიასთან თამაშის წინ “დინამო არენას” საპრესკონფერენციო დარბაზში პრესკონფერენცია გამართა. მან ისაუბრა მეტოქის თამაშის შესახებ, ხაზი გაუსვა ახალგაზრდა ქართველი ფეხბურთელების დიდ პოტენციალს და იმედი გამოთქვა, რომ ხვალინდელი მატჩი მასპინძლებისთვის წარმატებული გამოდგება.

“ჩვენ ვნახეთ შოტლანდიელთა უკანასკნელი ოთხი მატჩი და შემიძლია გითხრათ, რომ გრძელ პასებსა და ათლეტიზმს აღარ ანიჭებენ უპირატესობას. მათ ეს სტერეოტიპი, მითი დაარღვიეს. სტრაჩანის გუნდის სტილი მოკლე პასებით თამაშია, გათვლა კეთდება ბურთზე კონტროლის მოპოვებაზე. რაც შეეხება სათამაშო სქემებს, შოტლანდიელები ცვლიან ტაქტიკას, თუმცა იგივე სტილით თამაშობენ. მოკლედ რომ ვთქვა, შოტლანდიელები სანახაობრივ ფეხბურთს ანიჭებენ უპირატესობას.

მთავარ მწვრთნელად დანიშვნის შემდეგ მუდმივად ვცდილობ გუნდმა ბურთის კონტროლზე გააკეთოს აქცენტი, რაც მოედანზეც კარგად ჩანს, თუმცა ამ მხრივ კვლავ გვაქვს პრობლემები და მწვრთნელთა შტაბი ამ საკითხზე ზრუნვას აგრძელებს. ხვალინდელ მატჩშიც სწორედ ბურთის კონტროლი იქნება მთავარი ამოცანა, ასეთ შემთხვევაში შესაძლებელია ფეხბურთელების ფიზიკური მომზადება დამაკმაყოფილებელი აღმოჩნდეს.

ასეთი რთული მატჩის წინ სასიხარულოა, რომ იმ ფეხბურთელებს, რომლებსაც ძირითად შემადგენლობაში მოვიაზრებ, სათამაშო პრაქტიკა აქვთ.

პოლონეთთან გასვლით მატჩში მეორე გოლის გაშვების შემდეგ თავდაჯერება დავკარგეთ. ევროპაში ფეხბურთს მსაჯის სასტვენამდე თამაშობენ, ჩვენ კი მენტალური პრობლემები ვერ დავძლიეთ. სამწუხაროდ, ეს არ არის პირველი შემთხვევა, კონცენტრაციის დაკარგვა წარსულშიც გვახასიათებდა.

ჩვენი სამომავლო მიზანი შესარჩევ ციკლში მესამე ადგილის დაკავებაა. ამისათვის კი აუცილებელია ესეთი დონის ნაკრებებთან ტოლსწორად თამაში, რაც შედეგშიც უნდა აისახოს.

ნაკრებში მოწვეულ ახალგაზრდა მოთამაშეებს დიდი პოტენციალი აქვთ. ამ ეტაპზე გარკვეულ დათმობაზე წავედით და რამდენიმე მათგანი ახალგაზრდულ გუნდს დავუთმეთ, თუმცა ოთარ კაკაბაძის შემთხვევაში სხვა გამოსავალი არ იყო. ეროვნულ გუნდში მხოლოდ ერთი მარჯვენა მცველი უჩა ლობჟანიძე მყავდა, ამიტომაც აუცილებელი იყო კაკაბაძის გუნდში ყოფნა.

გიორგი გველესიანს იდეალური მონაცემები აქვს. ყველაფერი მასზეა დამოკიდებული. მთავარია შრომა. ვფიქრობ, გერმანიაში რომ თამაშობდეს, უმაღლესი დონის მცველად ჩამოაყალიბებდნენ.

ეროვნული ნაკრების კაპიტანი ხვალინდელ მატჩში ჯაბა კანკავა იქნება. იგი მაღალი დონის ფეხბურთელია და თავის მოვალეობას იდეალურად ასრულებს”, – განაცხადა კახა ცხადაძემ.

მატჩი პარასკევს, ჩვენი დროით 20:00 საათზე დაიწყება.