2015 წლის ევროპის ჩემპიონატზე საქართველოს ეროვნული ნაკრების ერთ-ერთი მეტოქე სლოვენია ამერიკელი კალათბურთელის დამატებაზე ფიქრობს. Siol.net-ის ცნობით, ის, შესაძლოა, ბრაიანტ დანტსონი გახდეს.

როგორც ირკვევა, სლოვენიელთა თავკაცი იურე ზდოვცი გაძლიერებაზე მას შემდეგ დაფიქრდა, რაც ნაკრებში თამაშზე უარი თქვა ბენო უდრიჰმა და სავარაუდოდ, იგივეს მოიმოქმედებს ნაკრების ლიდერი გორან დრაგიჩი. გასაკვირი ისაა, რომ ხსენებული კალათბურთელები უკანახაზელები არიან, დანსტონი კი პირეოსის “ოლიმპიაკოსში” ცენტრის ანაც მძიმე ფორვარდის პოზიციაზე თამაშობს.

საინტერესოა, რომ ერთადერთი ამერიკელი, რომელსაც აქამდე სლოვენიელთა მაისური მოურგია, არიელ მაკდონალდია. მან რამდენიმე მატჩი 2011 წელს ჩაატარა. სლოვენიაში ასევე არ ყოფილან დაბადებული ალენ ომიჩი, მირზა ბეგიჩი, ჰასან რიზვიჩი, იურიცა გოლემაცი, ემირ პრელჯიჩი, ალეკსანდარ ჩაპინი და მილიან გოლიოვიჩი.

თუკი ისევ დანსტონს დავუბრუნდებით, აღვნიშნავთ, რომ ის ბერძნულ გრანდში 2013 წლიდან ირიცხება და ქართველი გიორგი შერმადინის თანაგუნდელიც ყოფილა. 29 წლის ამერიკელის სიმაღლე 2.03 მეტრია, წონა – 114 კგ. და მას ჩინებული ნახტომი აქვს.

აღსანიშნავია, რომ წლეულს ბრაიანტი ევროლიგის საუკეთესო დამცველად ზედიზედ მეორედ დაასახელეს. მან ტურნირზე 29 მატჩი ჩაატარა, საშუალო მონაგარი კი 7.1 ქულა, 4.4 მოხსნა და 1.1 დაფარება ჰქონდა.

შეგახსენებთ, რომ ევრობასკეტ-2015 5-20 სექტემბერს ერთბაშად ოთხ ქვეყანაში შედგება. საქართველოს და სლოვენიის ნაკრებები ზაგრებში დაგეგმილ C ჯგუფში ითამაშებენ, სადაც მათი მეტოქეები მასპინძელი ხორვატია, საბერძნეთი, მაკედონია და ჰოლანდიაც იქნებიან. საქართველოს და სლოვენიის ნაკრებთა მატჩი 6 სექტემბერს გახლავთ დაგეგმილი.