საქართველოს უმაღლესი ლიგის ბოლოსწინა ტურში სენსაციური ანგარიში დაფიქსირდა მიხეილ მესხის სათადარიგო სტადიონზე, სადაც “ცხინვალმა” რუსთავის “მეტალურგი” 7:2 გაანადგურა.

მატჩი მოულოდნელად დაიწყო. 30-ე წამზე ვასიკო ბაჩიაშვილმა გიორგი ივანიშვილი მეკარესთან პირისპირ გაიყვანა, ამ უკანასკნელმა კი ანგარიში გახსნა. პირველ ტაიმში რუსთაველები ხეირიანს ვერაფერს ქმნიდნენ და სიტუაციას მთლიანად ცხინვალელები აკონტროლებდნენ. კახი კაჭარავას გუნდიდან ირაკლი ლექვთაძე, გიორგი ივანიშვილი, ლასა შინდაგორიძე აქტიურობდნენ, მათ ბევრი სახიფათო მომენტიც შექმნეს, თუმცა რუსთაველთა მეკარე მოწოდების სიმაღლეზე იყო.

50 წუთზე გიორგი შუშიაშვილმა შეტევის მარჯვენა ფლანგიდან საჯარიმოს ცენტრალურ ნაწილთან ახლოს მდგარი ლევან ბერუაშვილი მოძებნა, ამ უკანასკნელმა კი ძლიერი დარტყმით ანგარიში გაათანაბრა. 8 წუთში კვლავ შუშიაშვილმა ამჯერად გიორგი ზვიადაძეს უპასა, ამ უკანასკნელმა საჯარიმოს ცენტრალურ ნაწილში ერთი მეტოქე ჩამოიცილა და ძლიერი დარტყმით ანგარიში რუსთაველთა სასარგებლოდ გახდა – 2:1.

ასეთი შტურმის შემდეგ “ცხინვალი არ მოეშვა და “მეტალურგის” ტანჯვაც ამის შემდეგ დაიწყო. 62 წუთზე შინდაგორიძემ მარჯვენა ფლანგიდან მეკარესთან პირისპირ დარჩენილი კაჭარავა მოძებნა და ნიკამაც ანგარიში გაათანაბრა. ერთ წუთში შეტევა კვლავ მარჯვენა ფლანგიდან დაიწყო, ივანიშვილმა საჯარიმოს მისადგომებთან შინდაგორიძე მონახა, შემტევი ერთ მეტოქეს გასცდა და თავისი გუნდი დააწინაურა – 4:2.

“ცხინვალმა” ამის შემდეგ 9 წუთით შეისვენა და მორიგი შტურმი განახორციელა. 72-ე წუთზე შინდაგორიძემ ჯარიმა დაარტყა, ბურთი ძელს მოხვდა, დამატებაზე კი გიორგი ცერცვაძემ იყოჩაღა. გატანილი გოლიდან 2 წუთში თარხნიშვილი-შინდაგორიძე-კაჭარავას სამსვლიანი კომბინაცია ნიკას დარტყმით დასრულდა, მართალია “მეტალურგის” მეკარემ ბურთი მოიგერია, მაგრამ ლაშა ქოჩლაძემ 5:2 დააფიქსირა.

79-ე წუთზე კაჭარავას დუბლის გაფორმების საშუალება ცერცვაძემ მისცა, 90-ე წუთზე კი ცერცვაძემ ივანიშვილს მარჯვენა ფლანგზე გადაცემა გაუკეთა, ამ უკანასკნელმა კაჭარავას ჰეთრიკი შეასრულებინა და ამით რუსთაველთა განადგურებაც დასრულდა.

“ცხინვალმა” კარგად ითამაშა, მეტოქეს ყველანაირად აჯობა, თუმცა უნდა ითქვას, ბევრი პრობლემის წინაშე მყოფი რუსთავის “მეტალურგი” სიძლიერის საზომად არ გამოდგება.

კილასონიას შეგირდები ბოლო ადგილზე არიან და 22 მაისს დასკვნით ტურში შინ “ტორპედოს” მიიღებენ, “ცხინვალი” კი სტუმრად “კოლხეთს” დაუპირისპირდება.

მიმდინარე სეზონში აღნიშნული მატჩი ჯერჯერობით ყველაზე შედეგიანია გატანილი ბურთების რაოდენობით. 9 გოლი სხვა არც-ერთ მატჩში არ გასულა. 7 გოლი თბილისის “დინამოსა” და “ცხინვალის” შეხვედრაში 2014 წლის 23 ოქტომბერს “დინამო არენაზე გავიდა, როდესაც დედაქალაქელებმა მეტოქე 6:1 გაანადგურეს. ასევე “დინამომ” 13 მაისს შინ “ზუგდიდი” 7:0 დაამარცხა. 24 აპრილს “დილამ” შინ “შუქურა” 5:2 გაანადგურა. კიდევ ერთი შედეგიანი მატჩის ავტორი კვლავ კაჭარავას გუნდია. 2 მაისს “ცხინვალმა” “სიონი” 4:3 დაამარცხა.

17 მაისი. თბილისი. “მიხეილ მესხი-2”.

ცხინვალი – მეტალურგი (რუსთავი) 7:2 (1:0)

ცხინვალი: ნადირაძე, ქარდავა, შინდაგორიძე (არაბული 79), თარხნიშვილი (ბურძენაძე 82), ივანიშვილი, ლექვთაძე (ქოჩლაძე 46), იმედაშვილი, მაისაშვილი, ცერცვაძე, ბაჩიაშვილი, კაჭარავა.

მთავარი მწვრთნელი: კახი კაჭარავა

მეტალურგი: ნადირაძე, ნარიმანიძე, შუშიაშვილი, ზვიადაძე, ხიზანეიშვილი, გაბაშვილი, ბერუაშვილი (სარიშვილი 74), ბარაბაძე, ოქროპირიძე (ციცქიშვილი 46), მიქაუტაძე, მინდორაშვილი.

მთავარი მწვრთნელი: ვარლამ კილასონია

გოლები: 1:0 ივანიშვილი (1), 1:1 ბერუაშვილი (50), 1:2 ზვიადაძე (58), 2:2 კაჭარავა (62), 3:2 შინდაგორიძე (63), 4:2 ცერცვაძე (72), 5:2 ქოჩლაძე (74), 6:2 კაჭარავა (79), 7:2 კაჭარავა (90).

გაფრთხილება: ბერუაშვილი (74).

მთავარი მსაჯი: გიორგი ყრუაშვილი