რუსეთის საფეხბურთო პირველი დივიზიონის 32-ე ტურში ხაბაროვსკის “სკა-ენერგიამ” თავის მოედანზე “ენისეის” 3:1 აჯობა და გამარჯვებულებში გოლები როგორც კახა ალადაშვილმა, ასევე, გუჯა რუხაიამ გაიტანეს.

32-ე წუთზე, გოგიტა გოგუას წაქცევისთვის საჯარიმო დარტყმა დაინიშნა და ალადაშვილმა დაახლოებით 20 მეტრიდან ზუსტად დაარტყა – 1:0. ის 76-ე წუთზე შეცვალეს. 85-ე წუთზე, როდესაც ანგარიში 1:1 იყო, რუსეთის მოქალაქე ნახევარმცველმა გუჯა რუხაიამ მასპინძლები დააწინაურა. მატჩში წერტილი გორის “დილას” ყოფილმა თავდამსხმელმა ბრაზილიელმა ნათან ჟუნიორმა დასვა. ხაბაროვსკელთა რიგებში მატჩის საუკეთესო მოთამაშედ დასახელებულმა გოგუამ და რუხაიამ სრულად ითამაშეს. “სკა-ენერგიას” 36 ქულა აქვს და 18 გუნდში მეთოთხმეტეა.

ძერჟინსკის “ხიმიკიმ” თავის მოედანზე სანკტ-პეტერბურგის “დინამო” 2:1 დაამარცხა. რუსეთის მოქალაქე მცველმა გიორგი ჯიქიამ მასპინძლებში სრულად ითამაშა და 61-ე წუთზე ყვითელი ბარათი მიიღო. “ხიმიკი” 27 ქულით მეჩვიდმეტეა.

კალინიგრადის “ბალტიკამ” გასვლაზე “ტიუმენთან” 0:3 წააგო. რუსეთის მოქალაქე მეკარე გიორგი შელია კალინინგრადელთა 18-კაციან განაცხადში არ იმყოფებოდა. “ბალტიკა” 33 ქულით მეთხუთმეტეა.