ქართველმა ჩოგბურთელმა ნიკოლოზ ბასილაშვილმა ისრაელის ქალაქ რაანანას ჩელენჯერის (საპრიზო ფონდი 125 ათასი დოლარი) ფინალში გააღწია და დღეს საღამოს ტიტულისთვის იბრძოლებს.

ნახევარფინალში ბასილაშვილი მოლდოველ რადუ ალბოტს გაეჯიბრა და მსოფლიო რეიტინგში 145-ე ადგილზე მყოფ მეტოქეს 7:6 (7:3), 6:4 სძლია. თამაში საათსა და 40 წუთს გაგრძელდა და ნიკოლოზმა 4-ვე ბრეიკ-პოინტი გამოიყენა, თავად კი მოწოდება 3-ჯერ დათმო.

საქართველოს პირველმა ჩოგანმა 4 ეისი მოაწოდა, 5 ორმაგი შეცდომა დაუშვა, ჯამში მოგებული გათამაშებების მიხედვით კი, მოლდოველს შესამჩნევად აჯობა – 81:69.

შეგახსენებთ, რომ 23 წლის ქართველ ჩოგბურთელს ამჟამად კლასიფიკაციაში 180-ე ადგილი უკავია, თუმცა, ისრაელში წარმატებული თამაშის წყალობით წინ აუცილებლად წაიწევს (ლაივ-რეიტინგში ნიკოლოზი უკვე 153-ეა).

ბასილაშვილს უკვე განაღდებული აქვს 65 სარეიტინგო ქულა, ფინალის მოგების შემთხვევაში კი, აქტივს 110 ქულას შემატებს. გადამწყვეტ მატჩში ქართველის მეტოქე მე-2 ნომრად განთესილი სლოვაკი ლუკას ლაცკო იქნება, რომელმაც გერმანელ მიხაელ ბერერს 6:1, 6:7 (4:7), 6:4 სძლია. ლაცკოს რეიტინგში 99-ე პოზიცია უკავია.