ლაშა სალუქვაძე არ ფიქრობს, რომ საქართველოს ფეხბურთელთა ეროვნული ნაკრების მთავარ მწვრთნელად კახა ცხადაძის დანიშვნის შემდეგ, ბაქოს “ინტერის” მოთამაშეებმა საქმისადმი დამოკიდებულება შეცვალეს. ამის შესახებ ბაქოელთა ქართველმა მცველმა აზერბაიჯანის პრემიერლიგის 27-ე ტურის ცენტრალურ მატჩში აგდამის “ყარაბაღთან” ფრის (0:0) შემდეგ ინტერნეტპორტალ azerisport.com-თან ისაუბრა.

- თამაშმა როგორ ჩაიარა?

- რთული მატჩი აღმოჩნდა. არც ჩვენ და არც მეტოქეს ასპროცენტიანი შანსი არ გვქონია. გატანას შევეცადეთ, მაგრამ ვერ მოვახერხეთ. ასე რომ, ფრე დავიმსახურეთ.

- შეიძლება ითქვას, რომ “ინტერმა” ჩემპიონობის იმედი დაკარგა?

- არა. ბრძოლას ბოლომდე ვაპირებთ. თუმცა, სიმართლე რომ ითქვას, ახლა ჩემპიონობა ძალიან გაგვიჭირდება. “ყარაბაღს” 9 ქულით ჩამოვრჩებით და ეს გუნდი ძალიან ძლიერია. ასეთი მეტოქის დაწევა რთული იქნება. ჩემი აზრით, “ინტერის” ჩემპიონობა არარეალურად გამოიყურება.

- მეორე ტაიმში “ინტერი” სამი შემტევი ფეხბურთელით თამაშობდა. ჩანდა, რომ მოგება ძალიან გსურდათ?

- ჩემი აზრით “ყარაბაღი” ფრეზე თამაშობდა, რადგან მეორე ტაიმში მოედანზე შუა ხაზის მესამე მოთამაშე შევიდა, რომელიც დაცვაში დადგა. მეტოქე არც გვიტევდა. მთავარი იყო არ წაეგო. “ყარაბაღმა” ძალიან ჭკვიანურად ითამაშა.

- რეინალდოს არყოფნამ ალბათ სამუშაო გაგიადვილათ?

- ასე არ ვფიქრობ. რეინალდოს წინააღმედეგ გვითამაშია და “დაგვიკეტავს”. ჩვენთვის მნიშვნელობა არ აქვს “ყარაბაღის” რომელი ფორვარდი დაგვიპირისპირდება, რადგან მეტოქე ძალიან ძლიერი სწორედ კოლექტიურ თამაშშია.

- ჩემპიონობის შანსი მაინც ხომ რჩება?

- მათემატიკური გათვლებით შანსი გვაქვს. თუმცა, ძალიან გაგვიჭირდება. ამიტომ, შემიძლია ვთქვა, რომ ჩემპიონი “ყარაბაღი” იქნება.

- შეიძლება იმის გაფიქრება, რომ მას მერე რაც “ინტერის” თავკაცი საქართველოს ნაკრების მთავარ მწვრთნელად დანიშნეს, ფეხბურთელებმა მატჩებისადმი მიდგომა შეცვალეს?

- მსგავსი რამ არაა. ყველაფერი ისეა როგორც ადრე. თამაშებისთვის სერიოზულად ვემზადებით და მოედანზე გამარჯვებისთვის გავდივართ.