ესპანეთის ეროვნული ნაკრების მთავარმა მწვრთნელმა ვისენტე დელ ბოსკემ ჰოლანდიასთან “ამსტერდამ არენაზე” წაგებული (0:2) ამხანაგური შეხვედრის შემდეგ განაცხადა, რომ საერთო ჯამში “ფურია როხას” კარგი მატჩი გამოუვიდა, მაგრამ გოლი ვერ გაიტანა.

“ისე ჩანდა თითქოს გოლის გატანა შეუძლებელი იყო. მატჩს აშკარად ვაკონტროლებდით, მივდიოდით მეტოქის კარის საჯარიმომდე, მაგრამ გოლის გატანა გვაკლდა.” – განაცხადა ესპანელმა სპეციალისტმა.

ბრაზილიაში გამართულ მუნდიალზე ჰოლანდიელებმა ესპანელები 5:1 დაამარცხეს და “ფურია როხასთვის” აღნიშნული ამხანაგური მატჩი რევანშისთვის კარგი იქნებოდა. ესპანური პრესაც იუწყებოდა, რომ დელ ბოსკეს შეგირდებს ჰოლანდია პრესტიჟის გამო უნდა დაემარცხებინათ, ესპანეთის ნაკრებმა კი ბოლო დროს ცუდ ფორმაში მყოფ ჰოლანდიას ლიდერების არიენ რობენის და რობინ ვან პერსის გარეშე მაინც ვერ მოუგო.