“მანჩესტერ იუნაიტედის” მთავარმა მწვრთნელმა ლუის ვან გაალმა “სანდერლენდთან” დაპირისპირებამდე პრესკონფერენცია გამართა. ჰოლანდიელმა სპეციალისტმა აღნიშნა, რომ “წითელ ეშმაკები” მესამე და მეოთხე ადგილებისთვის თუ იბრძოლებენ.

პრემიერლიგის ლიდერები ლონდონის “ჩელსი” და “მანჩესტერ სიტი” არიან. ჩემპიონთა ლიგის საგზურისთვის კი ერთბაშად 5 გუნდი: “არსენალი”, “მანჩესტერი”, “საუთჰემპტონი”, “ლივერპული” და “ტოტენჰემი” იბრძვის.

ვან გაალმა აღიარა, რომ ამ ეტაპზე მანჩესტერელებს არ ჰყავთ ისეთი ფეხბურთელი, რომელიც სეზონში 20 გოლს გაიტანს.

“ეს მართალია, რადგან არ შეგვიძლია უარვყოთ. რობინ ვან პერსი და რადამელ ფალკაო ამას ვერ უარყოფენ, უეინ რუნიც, მაგრამ იგი თავდამსხმელის პოზიციაზე გარკვეული პერიოდია აღარ თამაშობს. არ შეგვიძლია თავი ავარიდოთ იმ ფაქტს, რომ არ გვყავს ფორვარდი, რომელიც ამ სეზონში 20 გოლს გაიტანს.” – განაცხადა ნიდერლანდელმა.

პრემიერლიგის მიმდინარე სეზონში ბომბარდირთა დავას “სიტის” და “ჩელსის” არგენტინელი და ესპანელი ფეხბურთელები სერხიო აგუერო და დიეგო კოშტა 17 გატანილი გოლით ლიდერობენ. 26 ტურის შემდეგ კი “მანჩესტერის” საუკეთესო ბომბარდირი ვან პერსია (10 გოლი).