19 თებერვალს სპორტკომპლექს არენა 1-ში ამხანაგური მატჩი გაიმართა მინი-ფეხბურთში თბილისში მიმდინარე ჭადრაკის გრან პრის მონაწილე მოჭადრაკეებსა და ქართველ ოლიმპიურ ჩემპიონებს შორის.
მოჭადრაკეთა გუნდში თბილისის გრან პრის ეტაპის ლიდერის - ევგენი ტომაშევსკისთან ერთად (რუსეთი), ასევე პიოტრ სვიდლერმა (რუსეთი), დიმიტრი იაკოვენკომ (რუსეთი), მაქსიმ ვაშიე-ლაგრავმა (საფრანგეთი), ლენიერ დომინგესმა (კუბა) და რუსტამ კასიმჟანოვმა (უზბეკეთი) ითამაშეს.
ქართველ ოლიმპიელთა შემადგენლობა ასეთი იყო - კახი კახიაშვილი (3-გზის ოლიმპიური ჩემპიონი ძალოსნობაში), გიორგი ასანიძე (ოლიმპიური ჩემპიონი ძალოსნობაში), მანუჩარ კვირველია (ოლიმპიური ჩემპიონი ბერძნულ-რომაულ ჭიდაობაში), დავით გობეჯიშვილი (ოლიმპიური ჩემპიონი თავისუფალ ჭიდაობაში), ვახტანგ ბლაგიძე (ოლიმპიური ჩემპიონი ბერძნულ-რომაულ ჭიდაოაბში). რამაზ ნოზაძე (მსოფლიოს და ევროპის ჩემპიონი, ოლიმპიური პრიზიორი ბერძნულ-რომაულ ჭიდაობაში).
აღსანიშნავია, რომ მატჩის მთავარი არბიტრი გახლდათ მსოფლიოს ხუთგზის ჩემპიონი და თერთმეტი საჭადრაკო ოლიმპიადის გამარჯვებული - ნონა გაფრინდაშვილი.
შეხვედრა ოლიმპიელების გამარჯვებით 5:3 დასრულდა.
ჭადრაკის გრან პრის რაც შეეხება, თბილისში მიმდინარე მსოფლიო ეტაპს 4 ტურის შემდეგ 3.5 ქულით ევგენი ტომაშევსკი ლიდერობს, მე-5 ტურის შეხვედრები 20 თებერვალს გაიმართება. საქართველოს სახელს გრან პრიზე ბაადურ ჯობავა იცავს, რომელსაც ჯერჯერობით მხოლოდ 0.5 ქულა აქვს მოგროვილი და მე-12 ადგილს იკავებს.
