ლეგენდარული ბრაზილიელი ფეხბურთელი რონალდინიო ივნისიდან შესაძლოა ანგოლის ჩემპიონატში ვიხილოთ. ამის შესახებ ანგოლური “კაბუსკორპის” პრეზიდენტმა ბენტო კანგამბამ ანგოლის ერთ-ერთ ტელევიზიისთვის მიცემულ ინტერვიუში განაცხადა.

“დარწმუნებით შემიძლია ვთქვა, რომ რონალდინიო ივნისიდან ჩემს გუნდში ითამაშებს. ამ ეტაპზე ბოლო დეტალების მოგვარებაზე ვმუშაობთ. მას კონტრაქტი ჯერ კიდევ აკავშირებს თავის ამჟამინდელ გუნდთან, რომლის ამოწურვის შემდეგ ჩვენთან გადმოვა. რონალდინიოს დამატება იმიტომ გადავწყვიტეთ, ჩემი კლუბისთვის ხარისხის ამაღლება მსურს”, - განაცხადა კანგამბამ.

აღსანიშნავია, რომ “კაბუსკორპის” რიგებში აქამდე კიდევ ერთ ლეგენდარულ ბრაზილიელს, რივალდოს უთამაშია, რომელიც აფრიკულ გუნდში 2012 წელს ასპარეზობდა და 21 მატჩში 11 გოლიც გაიტანა.

34 წლის რონალდინიო ამჟამად მექსიკური “კერეტაროს” ღირსებას იცავს.