“ვალენსიას” ახალგაზრდა მცველს ჟოაო კანსელოს ძირითად შემადგენლობაში დამკვიდრების კარგი შანსი გაუჩნდა. გასულ შაბათს “ალმერიასთან” მოგებულ (3:2) შეხვედრაში მისმა კონკურენტმა ანტონიო ბარაგანმა ტრავმა მიიღო, 44-ე წუთზე შესაცვლელი შეიქნა და მის ნაცვლად მოედანზე სწორედ ახალგაზრდა პორტუგალიელი გამოჩნდა, რომელიც ძალიან აქტიურად ჩაერთო თამაშში და ერთ-ერთი საუკეთესოც იყო.

“ვალენსიას” ოფიციალური ვებ-გვერდის ჟურნალისტმა ახალგაზრდა პორტუგალიელთან მცირე ინტერვიუ ჩაწერა, სადაც ნიჭიერმა მოთამაშემ რამდენიმე საკითხზე ისაუბრა.

“ალმერიასთან” შეხვედრაზე

“ვფიქრობ, რომ ძალიან კარგად ვითამაშეთ. მეტოქეს კარგად ვყავდით შესწავლილი და ყველანაირად ცდილობდა ხელი შეეშალა ჩვენთვის, თუმცა სასურველ შედეგს მაინც მივაღწიეთ. ჩემი აზრით, სწორი გზით მივდივართ და ასევე უნდა განვაგრძოთ”,

ბარაგანის შეცვლაზე

“როდესაც ანტონიომ ტრავმა მიიღო, მწვრთნელმა დამიძახა და მითხრა მხოლოდ თამაშზე მეფიქრა და ის გამეკეთებინა, რაც შემეძლო. ყველაფერს გავაკეთებ, რომ შანსი გამოვიყენო და უფრო ხშირად ვითამაშო”,

მისი სამომავლო როლი გუნდში

“მე ყოველთვის მზად ვარ სათამაშოდ და დანარჩენი მწვრთნელის გადაწყვეტია, როდესაც ის ჩათვლის საჭიროდ, მაშინ ვითამაშებ. მე და ჩემი გუნდელები ყოველდღე ბევრს ვვარჯიშობთ და ვფიქრობ, სათამაშოდ ყველანი მზად ვართ. მე ბევრს ვმუშაობ და ახალ დეტალებს ვსწავლობ. გუნდში ახალი მოთამაშე ვარ და აქ მოსვლის შემდგომ, მწვრთნელისგან ბევრი ახალი რამ გავიგე. ვგრძნობ, მაღალ დონეზე სათამაშოდ მზად ვარ და ყოველდიურად ნელ-ნელა ვიხვეწები”,

შესაძლო ახალწვეულებზე

“ახალწვეულების საკითხი მე არ მეხება. მე კონცენტრირებული ვარ ჩემს სამუშაოზე და ვცდილობ გუნდს ისე დავეხმარო, როგორც შემიძლია”,

20 წლის ფეხბურთელის სატრანსფერო უფლებებს “ბენფიკა” ფლობს და “ვალენსიაში” იჯარის წესით თამაშობს. “ღამურები” სამომავლოდ მის გამოსყიდვას გეგმავენ.

მიმდინარე სეზონში ჟოაომ “ლოს ჩეს” მაისური 6-ჯერ მოირგო. ახლა კი, ბარაგანის ტრავმის შემდგომ მშვენიერი შანსი აქვს, რომ ძირითად შემადგენლობაში დაიმკვიდროს ადგილი.