მსოფლიო ფეხბურთის მმართველი ორგანოს (FIFA) გადაწყვეტილებით, “ნიცას” ახალწვეული ჰატემ ბენ არფა, მიმდინარე სეზონის ბოლომდე, ფრანგული კლუბის მაისურით თამაშს ვერ შეძლებს. ამის მიზეზი ისაა, რომ 27 წლის ფეხბურთელმა, 2014/15 წლების სეზონში, უკვე 2 კლუბის მაისურით ითამაშა.

ბენ არფამ სეზონი “ნიუკასლში” დაიწყო და “კაჭკაჭების” ახალგაზრდულ გუნდში ერთი თამაში ჩაატარა. სეზონის დაყებიდან მალევე ის “ჰალში” გაანათხოვრეს, რომლის რიგებშიც ფეხბურთელმა 9 შეხვედრა ჩაატარა. იანვარში კი, ბენ არფამ “ნიცას” მიაშურა.

FIFA-ს წესების თანახმად, ფეხბურთელს უფლება აქვს სეზონის განმავლობაში 3 გუნდის მოთამაშედ დარეგისტრირდეს, მაგრამ მხოლოდ ორ მათგანში ითამაშოს. იმის გამო, რომ FIFA-მ სათვალავში “ნიუკასლის” ახალგაზრდულ გუნდში ჩატარებული თამაშიც მიიღო, ფრანგ ფეხბურთელს მიმდინარე სეზონში სხვა კლუბის მაისურით მოედანზე გასვლა აეკრძალა.