იტალიური "რომას" კაპიტანი ფრანჩესკო ტოტი მორიგ რეკორდს უმიზნებს. საქმე იტალიის სერია A-ში გამართული დერბების საუკეთესო ბომბარდირობას ეხება. ტოტის ამ დროისთვის რომაულ დერბიში 11 გოლი აქვს გატანილი. ამ მხრივ სარეკორდო მაჩვენებლები კი "იუვენტუსის" ლეგენდას ჯამპიერო ბონიპერტის და "მილანის" ყოფილ ფორვარდს ანდრეი შევჩენკოს ეკუთვნით. ორივე ხსენებულ თავდამსხმელს დერბიში 14-ჯერ გაუტანიათ. "ჩესკოს"'განცხადებით, იგი ჯერ კარიერის დასრულებას არ აპირებს, შესაბამისად ამ რეკორდის დამხობაც რეალობას დაშორებული არ უნდა იყოს.

"თავს კარგად ვგრძნობ, კიდევ მინდა გავაგრძელო თამაში და ტიტულები "რომასთან" ერთად მოვიგო", - თქვა ტოტიმ.

ფრანჩესკო ტოტიმ რომაულ დერბიში სადებიუტო გოლი 1998 წელს გაიტანა, მას შემდეგ კი "ლაციოს" დამწუხრება კიდევ ათჯერ შეძლო. განსაკუთრებით ლამაზი გოლი 2002 წლის მარტში, ანჯელო პერუცის გაუტანა.