საქართველოს კალათბურთის ეროვნული ფედერაციის პრეზიდენტი ვიქტორ სანიკიძე თორნიკე შენგელიას „ვირტუს ბოლონიაში“ ტრანსფერს გამოეხმაურა.

ვეტერანმა ქართველმა კალათბურთელმა პოსტი სოციალურ ქსელში გამოაქვეყნა. საქმე ისაა, რომ სანიკიძე „ვირტუსში“ 2009-2012 წლებში თამაშობდა და ბოლონიურ კლუბს ძალიან კარგად იცნობს.

„ვირტუს ბოლონიამ“ აირჩია დიდი მოთამაშე, მებრძოლი, შრომისმოყვარე, ლიდერი და უპირველეს ყოვლისა ნამდვილი ადამიანი, დიდი ბიჭი, სავსე გულით! ფორცა „ვირტუს!“ თოკო ერთ-ერთი ჩვენგანია. თოკო, შენ მსოფლიოში საუკეთესო ადგილას ჩამოხვედი“, - წერს სანიკიძე.

„ვირტუს ბოლონიაში“ 2009-2012 წლებში ვიქტორ სანიკიძე თამაშობდა, ხოლო შენგელიამდე ცსკა-დან ხუთი დღის წინ დანიელ ჰაკეტი დაიმატა. გარდა ამისა, გუნდში ისეთი გამოცდილი მოთამაშეები არიან, როგორებიც მარკო ბელინელი და მილოშ ტეოდოსიჩი გახლავთ. „ვირტუსი“ იტალიის სერია A-ში 16 მოგებით და 3 წაგებით მეორე ადგილზეა და მხოლოდ „ოლიმპია მილანოს“ ჩამორჩება, უახლოეს შეხვედრას კი 13 მარტს, თანაქალაქელ „ფორტიტუდოსთან“ გამართავს. აქვე გეტყვით, რომ იტალიური კლუბი ევროლიგაზე არა, მაგრამ ევროთასის გათამაშებაში მონაწილეობს.