ესპანური „კარტახენას“ წარმომადგენლები საქართველოს ფეხბურთის ფედერაციასთან გიორგი აბურჯანიას შესახებ მოლაპარაკებებს აწარმოებენ. laverdad.es წერს, რომ კლუბის მიზანია გიორგი ეროვნულ ნაკრებში ერთი დღით გვიან გაუშვას.

საქმე ისაა, რომ საქართველოს ნაკრები მსოფლიოს 2022 წლის ჩემპიონატის მატჩებისთვის შეკრებას 22 მარტიდან იწყებს, მაგრამ იმავე დღეს „კარტახენა“ ლა ლიგა 2-ის 30-ე ტურში „ალბასეტეს“ ხვდება, რომელიც მისი უშუალოდ კონკურენტია ლიგაში დასარჩენად და აბურჯანია „კარტახენას“ ერთ-ერთი ლიდერია, ამიტომ, სურთ, რომ მნიშვნელოვან მატჩში ის გუნდში იყოს და ნაკრებს 23 მარტს შეუერთდეს.

აღსანიშნავია, რომ სანაკრებო პაუზის დროს ესპანეთის ლა ლიგა 2-ში პაუზა არ ცხადდება და ამიტომ, „ალმერიას“ მეკარე გიორგი მაკარიძე ნაკრებში არ გამოიძახეს. დღეს ვილი სანიოლმა პრესკონფერენციაზე განაცხადა, რომ კლუბებიდან გამოშვებაზე ორ ფეხბურთელს ჰქონდა პრობლემა - ერთი მაკარიძეა, მეორეს გვარი მას არ დაუკონკრეტებია, მაგრამ აშკარაა, რომ აბურჯანია იგულისხმა.

"ნაკრებში გამოძახებულ ფეხბურთელთა შორის, მაკარიძე იყო ერთადერთი შემთხვევა, როცა მის კლუბთან საუბარი გვქონდა და გადავწყვიტეთ გაგვეთვალისწინებინა ის, რომ მისი გუნდი ლა ლიგაში გადასასვლელად იბრძვის. ასევე არის კიდევ ერთი ფეხბურთელი, რომლის კლუბთან გვქონდა პრობლემა, სხვა შემთხვევაში ასეთ ფაქტს ადგილი არ ჰქონია", - თქვა ფრანგმა.

აქვე გეტყვით, რომ გიორგი აბურჯანია „კარტახენაში“ იანვარში გადავიდა და 7 მატჩში 1 გოლი გაიტანა. 26 წლის ნახევარმცველი კარგ ფორმაშია, ბოლო მატჩში ულამაზესი გოლი გაიტანა და ტურის სიმბოლურ ნაკრებში მოხვდა ავტორიტეტული As-ის ვერსიით. საქართველოს ნაკრებში გიორგი აბურჯანიას 19 თამაში აქვს ჩატარებული.