ლევან ყენია გელზენკირხენის “შალკეს” სარეზერვო გუნდში ვარჯიშობს, რაც იმითაა გამოწვეული, რომ ამ ზაფხულს გუნდიდან მიდის. რაც მთავარია, 21 წლის ქართველი ნახევარმცველი ჯანმრთელადაა, სრული დატვირთვით აგრძელებს მზადებას და ზაფხულს ელის – როცა სხვა გუნდში გააგრძელებს კარიერას. სად, ჯერ უცნობია.
“მსოფლიო სპორტი” ლევანს გერმანიაში დაუკავშირდა:
- სამი კვირაა, რაც სარეზერვო გუნდში ვვარჯიშობ. ინტენსიურად ვემზადები, თავს კარგად ვგრძნობ.  
- თუმცა, როგორც ვიცით, სარეზერვოებში თამაშის უფლება არ გაქვთ.
- ასეა. არაევროკავშირელი ვარ და პროფესიული კონტრაქტი მაქვს – ამიტომაც არ შემიძლია.
- რატომ გადაგიყვანეს მეორე გუნდში?
- კონტრაქტი მიმთავრდება და გაგრძელება გამორიცხულია.
- ანუ, არანაირი შანსი არაა, რომ ახალ კონტრაქტზე შეთანხმდეთ და “შალკეში” დარჩეთ?
- არა. წასვლა გადაწყვეტილია.
- სავარაუდო გუნდებზე ხომ ვერ გვეტყვით?
- კონკრეტული ჯერ არაფერია. საუბარი არის, მაგრამ ისეთი, რომ რომელიმე კლუბი გამოკვეთილიყო, ასე არაა. ვნახოთ, მეც ველოდები.
- ინტენსიურად ვარჯიშობთ, თუმცა სათამაშო პრაქტიკა რომ არ გაქვთ, ესაა ცუდი. არ გიჭირთ ტონუსში ყოფნა?
- რიტმში შესასვლელად დრო მჭირდება. უკეთესობა არის, მაგრამ თქვენც იცით, რომ ძველებური ფორმისგან შორს ვარ.
- ტრავმის შიში კიდევ გაქვთ?
- მცირე შიში მაქვს, მაგრამ იმედია, გამივლის. ეს ჩვეულებრივია, როცა ამდენი ხნის განმავლობაში არ გითამაშია. ახლა მთავარია, ჯანმრთელად შევხვდე სატრანსფერო პერიოდს.   
- და ბოლოს, როგორც ვიცით, მალე მამა გახდებით.
- დიახ. მოუთმენლად ველოდები. უახლოეს დღეებში შვილი შემეძინება.

ილია ნანობაშვილი