24 წლის ქართველი მცველი მათე ღვინიანიძე კვლავ “სევასტოპოლშია” და როგორც თავად ამბობს, პირველ ლიგაში თამაშის პრობლემა არ აქვს. გეცოდინებათ, მათე წლეულს იანვარში გადავიდა გერმანული “მიუნხენ 1860”-დან უკრაინულ კლუბში, რომელიც პრემიერლიგიდან გავარდა.
საინტერესოა, რომ “სევასტოპლის” ფანების გამოკითხვით, ღვინიანიძე გუნდში სეზონის საუკეთესო მცველი გახდა. კლუბის საიტთან ქართველის ინტერვიუ სწორედ ამ თემით იწყება.
- გულშემატკივრებმა სეზონის საუკეთესო მცველად დაგასახელეს გუნდში. თავად როგორ შეაფასებთ თქვენს თამაშს “სევასტოპოლში”?
- თავად უკმაყოფილო ვარ. ძალიან მინდოდა პრემიერლიგაში დარჩენა, ეს გუნდის და მათ შორის, ჩემი მიზანიც იყო, მაგრამ ვერ შევასრულეთ. გუნდის საუკეთესო მცველი – ეს ჩემთვის სიახლეა და პირველად თქვენგან გავიგე. გულშემატკივრებს მადლობას ვუხდი და ვპირდები მათ, რომ რაც შემიძლია ყველაფერს გავაკეთებ პრემიერლიგაში დასაბრუნებლად.
- ანუ, მომდევნო სეზონსაც “სევატოპოლში” გაატარებთ?
- ეს ჩემთვის პრობლემა არაა. ბევრჯერ მითქვამს, რომ “სევასტოპოლი” მიყვარს. ერთი დიდი ოჯახი ვართ და იმედი მაქვს, გულშემატკივრები პირველ ლიგაშიც ისე დაგვიჭერენ მხარს, როგორც პრემიერლიგაში. აქაურობა მიყვარს.
- კლუბის მიზანიც სწორედ პრემიერლიგაში გადასვლაა და ამიტომ დარჩნენ წამყვანი ფეხბურთელები. თქვენ რა ფაქტორმა გადაგაწყვეტინათ “სევასტოპოლში” დარჩენა?
- კლუბის ხელმძღვანელობამ დარჩენის საშუალება მომცა და ვხედავ, რომ სეზონისთვის მიზანი დასახულია. ლევანდოვსკისთან, დულიაისთან და სხვა ბიჭებთან ერთად შევეცდები, რომ პრემიერლიგაში დავაბრუნოთ კლუბი.
აქვე გეტყვით, რომ “სევასტოპოლმა” საკონტროლო შეხვედრაში “ბუკოვინასთან” 1:1 ითამაშა, ღვინიანიძემ კი 70 წუთი გაატარა მინდორზე.

ილია ნანობაშვილი