დღეს, ბულგარეთის ქალაქ სამოკოვში სტარტს აიღებს ევროპის ჩემპიონატი ჭაბუკ მოჭიდავეთა შორის. პირველები ხალიჩაზე თავისუფალი სტილით მოჭიდავეთა 42, 50, 58, 69, 85 კგ. კატეგორიების წარმომადგენლები გავლენ.

7 მაისს საქმეში 46, 54, 63, 76 და 100 კგ-ის წარმომადგენლებს ვიხილავთ, 8-9 მაისს ხალიჩა გოგონებს დაეთმობათ, 10-11 მაისს კი ევროპის პირველობას ბერძნულ-რომაული სტილით მოჭიდავეები დახურავენ.

ტურნირის პირველ დღეს ტურნირში 5 ქართველი მოჭიდავე ჩაებმება. გიორგი ხაჩიძე (42 კგ.) ასპარეზობას პირდაპირ მეოთხედფინალიდან დაიწყებს, სადაც გერმანელ იოჰან ვოეგელეს გაეჯიბრება.

მერვედფინალში ბელარუს კურიშტას დაუპირისპირდება ალექსანდრე კილაძე (50 კგ.). ამავე ეტაპზე მამუკა ჩაჩუას (58 კგ.) მეტოქე ლატვიელი აივარს სამუსონოკსი იქნება, ხოლო ნიკა კენჭაძე (69 კგ.) ძალებს აზერბაიჯანელ რავილ ბაბაზადესთან მოსინჯავს.

ყველაზე ადრე – 1/16-ფინალიდან ბრძოლას მოგელი მეზვრიშვილი (85 კგ.) იწყებს. მისი მოწინააღმდეგე სომეხი მხითარიანი გახლავთ.

ბულგარეთში წინასწარი ეტაპის შეხვედრები თბილისის დროით 11.00-დან 16.00 საათამდე გახლავთ დაგეგმილი, ხოლო ფინალური ბლოკი 20.00-დან 22.00 საათამდე შედგება.