როგორც მოსალოდნელი იყო, არტურო ვიდალი „ფლამენგოში“ გადავიდა. ინფორმაცია ბრაზილიური კლუბის ვებგვერდმა ოფიციალურად დაადასტურა.

35 წლის ჩილელი „ატლეტიკო მინეიროსთან“ მატჩის წინ გულშემატკივარს „მარაკანაზე“ წარუდგინეს. მან ბრაზილიურ გრანდთან 18-თვიანი კონტრაქტი გააფორმა და „ფლამენგოში“ 32-ნომერიანი მაისურით ითამაშებს. სამხრეთამერიკელი „მენგოს“ თავისუფალი აგენტის სტატუსით შეუერთდა, რადგან „ინტერთან“ კონტრაქტი ორი დღის წინ გაწყვიტა.

35 წლის ვიდალმა მილანური გუნდის მაისურით 71 მატჩი ჩაატარა და 4 გოლი გაიტანა. მას კარიერის განმავლობაში „კოლო-კოლოში“, „ლევერკუზენში“, „იუვენტუსში“, „ბაიერნსა“ და „ბარსელონაში“ უთამაშია. ჩილეს ნაკრებში კი ვიდალის აქტივში 133 მატჩი და 32 გოლია.