საქართველოს სამბოს ეროვნულმა ფედერაციამ განცხადება გამოაქვეყნა, რომლის მიხედვით ცნობილი გახდა, რომ ფედერაციის ბიუჯეტი 1 იანვრიდან მოყოლებული ცარიელია.

სამბოს ფედერაციისთვის უცნობია, რატომ არიან დაფინანსების გარეშე, მაგრამ უახლოეს მომავალში ვითარების უკეთესობისკენ შეცვლის იმედი გამოთქვეს.

„სამბოს ფედერაციის ბიუჯეტი ნული ლარია! გვინდა, დიდი მადლობა გადავუხადოთ ქართული სამბოს ყველა გულშემატკივარს იმ თანადგომისთვის, რომელსაც მუდმივად ვგრძნობთ. ამ წლების განმავლობაში ჩვენმა სამბისტემა არაერთ მნიშვნელოვან წარმატებას მიაღწიეს. მათი შრომისა და ძალისხმევის შედეგად, სხვადასხვა ქვეყანაში, მრავალჯერ აჟღერდა საქართველოს ჰიმნი. 2012 წლიდან, სახელმწიფოს ხელშეწყობით, ფედერაციაში მნიშვნელოვანი რეფორმები ხორციელდება. სწორედ, 2012 წლიდან, ყოველწლიურად, სამბოს ეროვნული ფედერაციის ბიუჯეტი იზრდებოდა და ეს ფაქტი, ქართველი სამბისტების წარმატებაში აისახებოდა.

აღსანიშნავია, რომ 2021 წელს, ტოკიოში, საერთაშორისო ოლიმპიური კომიტეტის სხდომაზე, სამბოს, როგორც სპორტის სახეობას, მუდმივი აღიარება მიანიჭეს და ოლიმპიური ოჯახის სრულუფლებიან წევრად აღიარეს. 2022 წელს, საქართველოს სამბოს ეროვნული ნაკრების წევრებმა, ყველა ასაკობრივ ჯგუფში ისეთ მნიშვნელოვან შეჯიბრებებში უნდა მიიღონ მონაწილეობა, როგორიცაა მსოფლიო ჩემპიონატი, ევროპის ჩემპიონატი, საერთაშორისო ტურნირები, რისთვისაც აუცილებელია მოსამზადებელი შეკრებები. ამასთან, შემოდგომაზე, საქართველომ უნდა უმასპინძლოს არჩილ ჩოხელის სახელობის ევროპის თასს.

თუმცა, 2022 წლის 1 იანვრიდან დღემდე, საქართველოს სამბოს ეროვნული ფედერაციის ბიუჯეტი, გაურკვეველი მიზეზების გამო, ნული ლარია. ამ ფონზე, წარმოუდგენელია ზემოხსენებული გეგმების განხორციელება. იმედს ვიტოვებთ, უახლოეს მომავალში, ყველა პრობლემა მოგვარდება“, - წერია განცხადებაში.