ტური ტურს მისდევს და საქართველოს კრისტალბეთ ეროვნულ ლიგაში მდგომარეობა უაღრესად იძაბება. „დინამო თბილისის“ გუშინდელი მარცხის შემდეგ ბათუმის „დინამოს“ ჩინებული შანსი ჰქონდა უპირატესობა გაეზარდა და გაზარდა კიდეც, მაგრამ...

მაგრამ გია გეგუჩაძის გუნდმა გორში, „დილასთან“ ვერ მოახერხა გამარჯვება, ოდენ უგოლო ფრეს და შესაბამისად, ერთადერთ ქულას დასჯერდა. ზღვისპირელები უპირატესობას ფლობდნენ, მაგრამ გოლი ვერ გაიტანეს და შედეგად, ვერც მოიგეს.

უნდა ვთქვათ, რომ 31-ე ტურით ყველაზე მეტად კმაყოფილი თბილისის „საბურთალო“ უნდა იყოს, რადგან გიორგი ჭიაბრიშვილის გუნდმა ორივე კონკურენტთან მოახერხა ჩამორჩენის შემცირება და თამამად შეგვიძლია ვთქვათ, რომ საჩემპიონო რბოლაში სრულყოფილად დაბრუნდა.

სეზონის ფინიშამდე სულ რაღაც ხუთი ტურიღა დარჩა. ბათუმის „დინამო“ „დინამო“ თბილისს ერთი, ხოლო „საბურთალოს“ სამი ქულით უსწრებს. ისიც უნდა აღინიშნოს, რომ აჭარლები „დინამოსთან“ ურთიერთშეხვედრებშიც ფლობენ უპირატესობას, რაც ცხადია, დამატებითი პლიუსია.

ამ დროისთვის კი, მხოლოდ იმის თქმაა შესაძლებელი, რომ სეზონის დარჩენილ ნაწილში ძალიან ბევრი საინტერესო და ვინძლო, დრამატული მოვლენები გველოდება...

„დილა“ – „დინამო“ (ბთ) 0:0 (0:0)