ჩემპიონთა ლიგის 2019-2020 წლების სეზონში 32 გუნდიდან 26 პირდაპირ ჯგუფურ ეტაპზე კვალიფიცირდება. დანარჩენი 6 ადგილი კი საკვალიფიკაციო ეტაპზე გათამაშდება. ხსენებული 26-დან კი 25 გუნდის ვინაობა უკვე ცნობილია.

ახლა დარწმუნებით შეგვიძლია ვთქვათ, რომ ევროპის უპრესტიჟულეს ტურნირზე ითამაშებენ:

ესპანეთი: „ბარსელონა“, „ატლეტიკო“, „რეალი“, „ვალენსია“

ინგლისი: „მანჩესტერ სიტი“, „ლივერპული“, „ჩელსი“, „ტოტენჰემი“

იტალია: „იუვენტუსი“, „ნაპოლი“, „ატალანტა“, „ინტერი“

გერმანია: „ბაიერნი“, „დორტმუნდი“, „ლაიფციგი“, „ლევერკუზენი“

საფრანგეთი: „პარი სენ ჟერმენი“, „ლილი“

რუსეთი: „ზენიტი“, „ლოკომოტივი“

პორტუგალია: „ბენფიკა“

უკრაინა: „შახტარი“

ბელგია: „გენკი“

თურქეთი: „გალათასარაი“

ავსტრია: „ზალცბურგი“

ვინაიდან, ჩემპიონთა ლიგის ფინალისტებმა „ლივერპულმა“ და „ტოტენჰემმა“ პრემიერლიგიდან უკვე მოიპოვეს ჯგუფური ეტაპის საგზური, ჩემპიონთა ლიგის გამარჯვებულისთვის განკუთვნილი და გამოთავისუფლებული ადგილი რანგით მე-11 ჩემპიონატის (ავსტრიის) ჩემპიონმა („ზალცბურგი“) შეავსო.

26-ე გუნდი ევროპა ლიგის გამარჯვებული იქნება. თუმცა, „ჩელსის“ ლიგის საგზური პრემიერლიგიდან უკვე მოპოვებული აქვს და ამდენად, „არსენალი“ ეცდება ინგლისის მეხუთე წარმომადგენელი გახდეს.

ცნობილია ისიც, თუ როგორ დაკომპლექტდება ჯგუფური ეტაპის წილისყრისთვის პირველი კალათა:

„ბარსელონა“ (ესპანეთი), „მანჩესტერ სიტი“ (ინგლისი), „იუვენტუსი“ (იტალია), „ბაიერნი“ (გერმანია), „პარი სენ ჟერმენი“ (საფრანგეთი), „ზენიტი“ (რუსეთი), „ლივერპული“ ან „ტოტენჰემი“ (ინგლისი), „ჩელსი“ ან „არსენალი“ (ინგლისი).

„ბარსელონა“ და „რეალი“ ჯგუფურ ეტაპზე 24-ედ ითამაშებენ, რაც რეკორდია. „იუვენტუსი“ კი მეექვსე გუნდი გახდება, რომელიც ჩემპიონთა ლიგის ჯგუფურ ტურნირზე მეოცედ გაირჯება. „ატალანტამ“ ისტორიაში პირველად მოახერხა ჩემპიონთა ლიგაზე კვალიფიცირება და შესაბამისად, ბერგამოელები დებიუტანტის სტატუსით ითამაშებენ.