საქართველოს ნაკრების შემტევი თორნიკე ოქრიაშვილი ისევ ტრავმირებულია. ქართველმა მარცხენა მუხლი "კრასნოდარისა" და "არსენალის" მატჩში დაიზიანა. ჯერჯერობით უცნობია, თუ რა სიმძიმისაა ტრავმა.

ოქრიაშვილი ტულის "არსენალთან" მატჩში 71-ე წუთზე შეცვლაზე შევიდა და ზუსტად 8 წუთში დაშავდა. აღსანიშანვია, რომ იგორ შალიმოვს სამივე შეცვლა იმ დროისთვის გამოყენებული ჰქონდა, ხოლო შარლ კაბორე გაძევებული გახლდათ და "კრასნოდარმა" თამაში 9 კაცის შემადგენლობით ჩაამთავრა.

შეგახსენებთ, თორნიკე ოქრიაშვილმა მუხლის მძიმე ტრავმის გამო 6 თვე უკვე გამოტოვა და მოედანს სულ რაღაც 2 კვირის წინ დაუბრუნდა. იმედია, ჩვენებურს სერიოზული დაზიანება არ აღმოაჩნდება.

თორნიკე უელსთან და სერბეთთან შეხვედრებისთვის საქართველოს ნაკრებშიცაა გამოძახებული.