მიუნხენის “ბაიერნის” მთავარი მწვრთნელი ხოსეპ გვარდიოლა საკუთარ გუნდს დაუმარცხებლად არ მიიჩნევს.
მიმდინარე სეზონში მიუნხენელები ბუნდესლიგას დამაჯერებლად ლიდერობდნენ. ამასთანავე, ჩემპიონთა ლიგის ჯგუფური ეტაპის დასკვნით ტურში “მანჩესტერ სიტისთან” მარცხის (2:3) მიუხედავად, პირველი ადგილი მაინც უპრობლემოდ დაიკავეს.
“ევროპის საუკეთესო გუნდი არ ვართ. გასულ სეზონში “ბაიერნმა” იუპ ჰაინკესის ხელმძღვანელობით ყველა ჯილდო მოიგო, მაგრამ ეს იმას სულაც არ ნიშნავს, რომ დანარჩენ გუნდებს ბევრიად ვჯობივართ. წინ კიდევ უამრავი სამუშაოა ჩასატარებელი და ზრდა უნდა გაგრძელდეს. გუნდი ძლიერი მხოლოდ მაშინაა, როდესაც რეგულარულად იგებს საერთაშორისო ჯილდოებს.
ბევრი ფიქრობს, რომ ბუნდესლიგაში უკვე ყველაფერი გარკვეულია, მაგრამ ყველამ იცის, რომ ეს სიმართლე არაა. ჯერ მხოლოდ დეკემბერია და ყველაფერი შეიძლება მოხდეს. გაოცებული ვიყავი ბუნდესლიგაში ჩატარებული საწყისი რამდენიმე მატჩის შემდეგ - ქულების მოპოვება აქ ძალიან ძნელია” - თქვა გვარდიოლამ.
